यार्सा टिप्न जानेको सुरक्षामा खटिएका हवल्दार बिते

यार्सा संकलन गर्नेहरूको सुरक्षामा खटिएका एक जना प्रहरीकाे लेक लागेर मृत्यु भएको छ । मुगुकाे कर्मारोङ गाउँपालिका–२ ठूलीकोशी रिमारमा खटिएका हवल्दार राजबहादुर सिंहको उपचारका क्रममा मृत्यु भएको हो ।

हिजो बिहानदेखि टाउको दुख्ने र स्वासप्रश्वासमा समस्या आएपछि उनलाई सँगै खटिएका प्रहरीले उध्दार गरी सीमा प्रहरी चौकी मुगु ल्याएका थिए । आज बिहान हेलिकाेप्टरमार्फत बाँकेको कोहलपुरस्थित मेडिकल कलेजमा ल्याइएकोमा उपचारकै क्रममा दिउँसो मृत्यु भएको जिल्ला प्रहरी कार्यालय मुगुले जनाएको छ ।

बाँकेको कोहलपुर नगरपालिका–११ घर भएका हवल्दार सिंह ०६७ सालमा प्रहरी जवान पदमा भर्ना भई ०७७ सालदेखि जिल्ला प्रहरी कार्यालयमा कार्यरत थिए ।