आसन्न फागुन २१ गतेको प्रतिनिधिसभा सदस्य निर्वाचनमा काठमाडौं उपत्यकामा कार्यरत प्रहरीले यतैबाट मतदान गर्न पाउने भएका छन् ।
विभिन्न जिल्लामा घर भएका तर उपत्यकामा खटिएका प्रहरीलाई जिल्ला निर्वाचन कार्यालय काठमाडौंमा मतदानको व्यवस्था गरिएको छ । त्यसका लागि प्रहरी प्रधान कार्यालयले उपत्यकास्थित कार्यालयहरुमा कार्यरत सम्पूर्ण कर्मचारीको नामावलीलगायत विवरण मागेको छ ।
पत्राचारमा भनिएको छ,‘निर्वाचनमा मतदान गर्ने प्रयोजनको लागि काठमाडौं उपत्यकास्थित कार्यरत सम्पूर्ण प्रहरी कर्मचारीहरुको नामावली संलग्न जिल्ला निर्वाचन कार्यालय काठमाडौंको पत्रको ढाँचाबमोजिम एक्सल सिट (कालिमाटी फन्ट) सफ्टकपी र प्रमाणित कपीसहित प्रहरी प्रधान कार्यालय प्रशासन शाखा र केन्द्रीय निर्वाचन सेलको इमेल ठेगानामा मिति २०८२–१०–१४ गते दिउँसो २ बजेदेखि अनिवार्य रुपमा खुलाई पठाउनुहुन अनुरोध गरिएको छ ।’
अख्तियार दुरुपयोग अनुसन्धान आयोग, प्रहरी महानिरीक्षकको सचिवालय, सबै विभाग, ब्युरो, सीयुजी शाखा, राष्ट्रिय प्रहरी प्रशिक्षण प्रतिष्ठान, प्रहरी अस्पताल, उपत्यका प्रहरी कार्यालयलगायतलाई पत्राचार गरिएको हो ।
