अनाथालय नजिकै गाडीको ठक्करले ढलेका श्रेष्ठको अस्पतालमा मृत्यु

दोलखाको चरीकोट-जिरी सडकखण्ड अन्तर्गत गौरीशङ्कर बालगृह नजिकै गाडी र मोटरसाइकल ठोक्किँदा एक जनाको मृत्यु भएको छ ।

भीमेश्वर नगरपालिका-४ अनाथालय नजिकै विपरीत दिशाबाट आइरहेको मोटरसाइकललाई योद्धा गाडीले ठक्कर दिँदा स्थानीय ३३ वर्षीय मोटरसाइकल चालक उमेश श्रेष्ठको मृत्यु भएको जिल्ला प्रहरी कार्यालय दोलखाले जनाएको छ ।

चरीकोटबाट तामाकोसीतर्फ जाँदै गरेको प्रदेश नम्बर ३–०१०२४ च ५९१९ नम्बरको गाडी र जिलुबाट चरीकोट आउँदै गरेको बा ७५ प ४५२१ नम्बरको मोटरसाइकल ठोकिँदा घाइते भएका श्रेष्ठलाई चरीकोटस्थित पशुपति चौलागाईं स्मृति अस्पतालमा पुर्याइएको र उपचारका क्रममा उनको मृत्यु भएको हो ।

गाडीसहित चालकलाई प्रहरीले नियन्त्रणमा लिई अनुसन्धान गरिरहेको जिल्ला प्रहरी कार्यालयका प्रहरी निरीक्षक सुशील केसीले बताए ।