गल्छीमा सवारी दुर्घटना हुँदा दुई जनाको मृत्यु, ड्राइभर फरार

धादिङको गल्छीमा जिप र ट्रक आपसमा ठक्कर खाँदा दुई जनाको ज्यान गएको छ । गल्छी गाउँपालिका-७ भल्टारमा गएराती भएको उक्त दुर्घटनामा परि जिपका चालक र सहचालकको मृत्यु भएको हो ।

जिप चालक दोलखाका अन्दाजी २५ वर्षीय प्रकाश नेपाली र सहचालक ठेगाना नखुलेका अन्दाजी १८ वर्षीय अनिस बोगटीको मृत्यु भएको प्रहरीले जनाएको छ । गम्भीर घाइते भएका दुवैको उपचारको क्रममा गल्छिस्थित अम्बेभरोसा अस्पतालमा आज बिहान सवा ३ बजे मृत्यु भएको हो ।

चितवनबाट काठमाडौँ आउँदै गरेको ना ५ च २६८३ नम्बरको जिप ओभरटेक गरेर अगाडि जानेक्रममा विपरीत दिशाबाट आउँदै गरेको ना ७ ख ९७७७ नम्बरको ट्रकसँग ठोक्किएको थियो । दुर्घटनालगतै सम्पर्कविहीन भएका ट्रक चालकको खोजी भइरहेको प्रहरीले बताएको छ ।