पाँच जुवाडे नगदसहित खालबाटै पक्राउ

धनगढीको बसन्त टोलस्थित एक घरबाट पाँचजना जुवाडे खालबाटै समातिएका छन् । प्रहरीले दिपु श्रीमालको घरमा जुवा खेलिरहेको अवस्थामा ८६ हजार नगद र पाँच बुक ताससहित जुवाडे समातिएका हुन् ।

जिल्ला प्रहरी कार्यालय कैलालीका अनुसार धनगढी–१ वसन्तटोलस्थित ४० वर्षीया दिपुको घरमा जुवा खेलिरहेको अवस्थामा उनीहरु पक्राउ परेका हुन् ।

पक्राउ पर्नेमा डोटीको दिपायल सिलगढी नगरपालिका–६ घर भई हाल धनगढी–३ बस्ने ६२ वर्षीय तेजबहादुर बोगटी, धनगढी–१ का ४८ वर्षीय धनबहादुर खड्का, ३० वर्षीय रमेश श्रीमाल, धनगढी–७ का २५ वर्षीय रामकृष्ण राना र ३९ वर्षे शान्तराम चौधरी रहेका छन् ।

पक्राउ परेका पाँचै जनामाथि आवश्यक अनुसन्धान भइरहेको कैलालीका प्रवक्ता प्रहरी नायव उपरीक्षक वेदप्रकाश जोशीले बताए ।