भारत जान लागेका तीन जना भारतीयको साथमा अमेरिकी पेस्तोल र गोली

जनकपुरबाट भारततर्फ जान लागेको तीन जना भारतीयको साथबाट पेस्तोल र गोली बरामद भएको छ । धनुषाको विदेह नगरपालिका, १ मैनाथपुरस्थित सीमा क्षेत्रबाट सशस्त्र प्रहरीले मेड इन यूएसए लेखिएको एउटा पेस्तोल र लोड गरिएको एक राउण्ड गोलीसहित उनीहरुलाई नियन्त्रणमा लिएको हो ।

पक्राउ पर्नेमा भारत घर भएका २९ वर्षीय राहुल रञ्जन, २० वर्षीय उज्वल कुमार र ३६ वर्षका सञ्जय कुमार हुन् । उनीहरुलाई सशस्त्र प्रहरी बल नेपालको बिओपी मैनाथपुरबाट खटिएको टोलीले हतियारसहित समातेको हो ।

बीआर ०६ ए.पी. ३००८ नम्बरको भारतीय नम्बर प्लेटको सुजुकी कारमा उनीहरु जनकपुरबाट भारततर्फ जान लागेका थिए । सोही क्रममा सशस्त्र प्रहरीको टोलीले कार रोकेर चेकजाँच गरेको थियो ।

पेस्तोल र ७.६५ एमएमको एउटा गोली कारको सिट मुनि लुकाई राखेको अवस्थामा फेला परेको सशस्त्र प्रहरीले बताएको छ ।

पक्राउ परेका तीनै जनालाई आवश्यक कारबाहीका लागि इलाका प्रहरी कार्यालय खजुरीमा बुझाइएको छ ।