भारतीय ट्रकमा साढे क्विण्टल गाँजा, तीन जना नियन्त्रणमा

लागूऔषध ओसारपसारमा संलग्न तीन भारतीय नागरिक समातिएका छन् । पर्साको वीरगञ्ज महानगरपालिका, २५ सिर्सियाको बाटो हुँदै दुई सय ५० केजी गाँजा ओसारपसार गर्न लागिएको अवस्थामा उनीहरुलाई पक्राउ गरिएको हो ।

प्रहरी टोलीले सिर्सिया सडक खण्डमा भारतीय ट्रकलाई नियन्त्रणमा लिएर चेक जाँच गर्ने क्रममा चालक बस्ने क्याबिनमा लुकाइछिपाइ राखेको अवस्थामा १० केजीको २५ पोका गाँजा फेला परेको हो । पर्सा जिल्ला प्रहरी कार्यालयका प्रवक्ता प्रल्हाद कार्कीका अनुसार उनीहरुविरुद्ध लागूऔषध सम्बन्धी कसूरमा अनुसन्धान अगाडि बढाइएको छ ।

पक्राउ परेकामा भारत बिहारका २० वर्षीय साहेव आलम, ४५ वर्षीय गुलाव मियाँ र १७ वर्षीय किशोर हुन् ।