सूर्याेदय नगरपालिकामा ५० करोडका आयोजना

सहरी विकासमन्त्री मेटमणि चौधरीले समावेशी संविधान, महिला, दलित, सीमान्तका पक्षमा उभिएको संघीय गणतन्त्रसहितको संविधान मास्ने षड्यन्त्र भएकाले सबै मिलेर एमालेलाई परास्त गर्न जरुरी भएको बताउनुभएको छ । उहाँले उक्त धारणा विभिन्न एकीकृत सहरी पूर्वाधार निर्माण कार्यक्रमअन्तर्गत इलामको सूर्याेदय नगरपालिकामा ५० करोडका कार्यक्रम शिलान्यासको क्रममा उल्लेख गर्नुभएको हो ।

पूर्वप्रधानमन्त्री तथा नेकपा एकीकृत समाजवादीका सम्मानित नेता झलनाथ खनाल र मन्त्री चौधरीले छ महत्वपूर्ण सडकको हिजो शिलान्यास गर्नुभएको छ । सहरी पूर्वाधार कार्यक्रमअन्तर्गत फिक्कल रिङ रोड, हुरहुरे भन्ज्याङ्–ग्यावाचोक, छब्बीसे –छिरुवा सडक, रातमाटे –माने डाँडा सडक, माने भन्ज्याङ–च्यामेखोला गोर्खे सडक शिलान्यास गरिएको हो । आयआर्जन जन्य पूर्वाधारतर्फ नगर बसपार्क, चिस्यान केन्द्र, कन्याम पार्क, पोखरी संरक्षणदेखि पोखरी सौन्दर्यकरणसम्मका कार्यक्रम छन् ।शिलान्यास कार्यक्रममा बोल्दै खनालले सूर्याेदय नगरपालिकालाई सुन्दर, आधुनिक र नमुना बनाउने जानकारी दिनुभयो । इलाम हिरा हो तर कुद्न बाँकी छ भन्दै खनालले भन्नुभयो, ‘रिङरोडको विकास, सन्दुकपुरको थप विकास, श्रीअन्तु डाँडाको सुन्दरतमा वृद्धि, होम स्टे, चिया बगान, यसको सौन्दर्यको अन्तर्राष्ट्रियकरण गरिने छ । त्यसपछि व्यापार, बिजनेस थप बढ्ने छ ।’

मन्त्री चौधरीले पनि झलनाथ खनाल जस्तो व्यक्तित्व भएको, पर्यटन र उत्पादनमा चिनिएको सुन्दर इलामलाई थप सुन्दर, व्यवस्थित बनाउन सहरी मन्त्रालयले कुनै कसर बाँकी नराख्ने बतउनुभएको छ । पहिलो पटक इलाम आएको बताउदै मन्त्री चौधरीले इलामका जनताले चाहे जस्तो विकसित सहर बनाउन पहल हुने उल्लेख गर्नुभएको छ ।

उहाँले भन्नुभयो, ‘सुन्दर चिया बगान देख्दा निकै आनन्द लागेको छ । इलामको विकासमा पैसाको कमी हुने छैन ।’ उहाँले मुलुकमा नयाँ संस्कार बसाल्न जरुरी रहेकोमा जोड दिनुभयो ।