सन्दीप लामिछानेको पक्षमा वक्तव्यबाजी, दुबै परिवार मिल्नुपर्ने सुझाव

किशोरी बलात्कारको आरोप लागेको किक्रेटर सन्दीप लामिछानेको पक्षमा उभिएको सन्दीप बचाउ अभियानले सामाजिक सञ्जालमा लेखिएका घटना विवरणमा कुनै सत्यता नभएको दाबी गरेको छ । सन्दीपमाथि बलात्कारजस्तो जघन्य अपराधको उजुरी परेपछि पूरै विश्वको ध्यानाकर्षण भएको उल्लेख गर्दै अभियानले घटना विवरणमा थोरै पनि सत्यता नभएको बताएको हो ।

घटना र जाहेरीको विवरणलाई नजिर मान्दै हिँडेमा नेपालका झ्यालखाना भरिने अभियानका संयोजक मनिष सापकोटाले बताए । उनले जारी गरेको विज्ञप्तिमा भनेका छन्,‘यस्ता घटनामा जाहेरी आएको विवरणलाई नजिर मान्ने हो भने नेपालका जेलहरु भरिन सक्छ । समाजको संरचना नै बिग्रेर अराजकता र विद्रोहतिर समाज र युवा परिभाषित हुन्छ ।’

कानून र विधिलाई सबैले सम्मान गर्नुपर्ने भन्दै घटनाको समाधानतर्फ आफूहरुले अग्रसरता लिएको उनीहरुले बताएका छन् । किशोर किशोरीहरुको सामाजिक सञ्जालको लत र विकृतिले डरलाग्दो रुप लिइरहेको अभियानको ठहर छ । अभियानले सबै पार्टीका नेता, युवा र राज्य संयन्त्रलाई परिचालित गराई दुवै परिवारलाई वार्तामा ल्याएर समाधान खोज्न आग्रह गरेको छ ।