अमेरिकी राजदूतसँगको भेटलगत्तै डा भट्टराई प्रचण्डकोमा

हिजो दिउँसो पूर्वप्रधानमन्त्री तथा नेपाल समाजवादी पार्टीका अध्यक्ष डा. बाबुराम भट्टराईसँग नेपालका लागि अमेरिकी राजदूत रेण्डी बेरीले भेटवार्ता गर्नुभएको छ । उहाँहरुबीच नागपोखरीस्थित होटल मेरियटमा कुराकानी भएको बताइन्छ ।

उहाँहरुबीच दिउँसो २ बजेपछि झण्डै आधा घण्टा चियापानसँगै छलफल भएको थियो । राजदूत बेरीले बिदाइ भेटको क्रममा डा. भट्टराईसँग कुराकानी गर्नुभएको दूतावास स्रोतले बतायो ।

राजदूत बेरीसँगको भेटपछि होटलबाट निस्क्नुभएका डा. भट्टराईले सोझै सिंहदरबार पुगेर नेकपा माओवादी केन्द्रका अध्यक्ष पुष्पकमल दाहाल प्रचण्डसँग भेट गर्नुभएको थियो । उहाँले संसद सचिवालयस्थित माओवादी केन्द्रका अध्यक्षको कार्यकक्षमा दाहालसँग ३ बजेदेखि झण्डै एक घण्टा कुराकानी गर्नुभएको संसद सचिवालयले पुष्टि गरेको छ ।