झापामा लागुऔषध कारोबारी छ्याप्छ्याप्ती, अर्को गिरोह पक्राउ

झापामा फेरि लागुऔषधसहित एउटा गिरोह पक्राउ परेका छन् । उनीहरु बिर्तामोड नगरपालिका र मेचीनगर नगरपालिकाबाट लागुऔषधसहित समातिएका हुन् ।

प्रहरीको लागुऔषध नियन्त्रण ब्युरो काकडभिट्टा र इलाका प्रहरी कार्यालय अनारमनीबाट खटिएको टोलीले भारतबाट नेपाल आउँदै गरेका तीन जनालाई गएराति पक्रेको बताइएको छ । उनीहरुलाई बिर्तामोड नगरपालिका ५, पाथिभरा टोलबाट १३ ग्राम ब्राउन सुगरसहित नियन्त्रणमा लिइएको हो ।

इलामको माई नगरपालिका–२ बस्ने २२ वर्षीय केबिन्द्र गोले, २७ वर्षका गोम्बु दोर्जे गोले र पाँचथर फाल्गुनन्द गाउँपालिका–५ बस्ने ३२ वर्षीय सन्त लिम्बु पक्राउ परेका छन् ।

त्यस्तै, रामेछाप नगरपालिका ८ का ३० वर्षीय विजय लामालाई हिजो दिउँसो साढे ४ बजे मेचीनगर नगरपालिका–६, मेची पुलबाट ब्राउन सुगर ७५ ग्राम, नेपाली १० हजार रुपैयाँ र सामसुङ मोबाइल १ थानसहित प्रहरीले नियन्त्रणमा लिएको छ ।

उनीहरु चारै जनालाई नियन्त्रणमा लिएर इलाका प्रहरी कार्यालय, काकडभिट्टाबाट अनुसन्धान भइरहेको बताइएको छ ।