सय दिनभित्र नक्सा पास गर्न विराटनगरकाे ताकेता

विराटनगर महानगरपालिकाले आफ्नो क्षेत्रभित्र नक्सा पास नगरी यसअघि बनाइएका घर तथा भवनको नक्सा पेश गरी स्वीकृत गर्न आग्रह गरेको छ ।

महानगरले नक्सा पास नभएका तर मापदण्ड अनुकूलका संरचनाको एक सय दिनभित्र प्रकिया पूरा गर्न सम्बन्धित सबैलाई आग्रह गरेको छ ।

सरकारी, संस्थागत, निजी वा जुनसुकै प्रयोजनको निम्ति बनाइएको भवनको नक्सा पास गर्न सूसुचित गराउँदै सूचनामा भनिएको छ, ‘नक्सा पास नगरी बनाइएको (तल्ला थपको नक्सा पास नगरेको समेत) र मापदण्ड अनुकूल रहेको भएमा त्यस्ता भवनको यो सूचना प्रकाशित भएको मितिले १०० दिन भित्रमा नक्सा पेश गरी स्वीकृत–नियमित गर्न सम्बद्ध सबै व्यक्ति, संघ संस्था, संस्थान तथा सरकारी निकायहरुलाई अनुरोध छ ।’

यस्तै, तोकिएको समयभित्र नक्सा पेश नगरेमा त्यस्ता भवनको विवरण संकलन गरी स्थानीय सरकार सञ्चालन ऐन, २०७४ र प्रचलित भवन निर्माणसम्बन्धी मापदण्डसंहिता, कार्यविधिबमोजिम कारबाही गर्ने चेतावनी पनि दिइएको छ ।