१२ वर्षपछि खोलो फर्कियो, छिमेकी मारेर भागेका छिपेनन्

छिमेकीको हत्या गरेर भागेका अर्घाखाँचीका दुई जना वर्षौंपछि पक्राउ परेका छन् । भूमिकास्थान नगरपालिका–१०, धनचौरका ४० वर्षीय शालिकबहादुर बुढा र ३६ वर्षीय नारायण बुढा अपराध गरेको १२ वर्षपछि समातिएका हुन् ।

जिल्ला प्रहरी कार्यालयका प्रमुख डीएसपी मुकुन्द रिजालका अनुसार उनीहरू १२ वर्षदेखि फरार थिए । प्रहरी निरीक्षक अर्जुन पौडेलको नेतृत्वमा खटिएको टोलीले गोप्य सूचनाका आधारमा उनीहरूलाई अर्घाखाँची र कपिलवस्तुको सिमानाबाट समातेको हो ।

२०६७ साल माघ २५ गते आफ्नै छिमेकी ४० वर्षीय दधिराम भुसालको हत्या गरेर भागेका यी दुईसहित नौ जनाविरुद्ध जिल्ला अदालत अर्घाखाँचीले २०७५ असार ३ गते २० वर्ष कैदको फैसला सुनाएको थियो । जसमध्ये छ जनाले कैद भुक्तान गरिरहेका छन् भने एक जना अझै फरार रहेको प्रहरीले जनाएको छ ।

पक्राउ परेका दुई जनालाई अदालतमा पेश गरेर प्रक्रिया अगाडि बढाइएको छ ।