मोटरसाइकल चोरेर भागेका दुई युवक पक्राउ

पर्साबाट चोरीका मोटरसाइकलसहित दुई जना पक्राउ परेका छन् । पटेर्वासुगौली गाउँपालिका-३ घर भएका १९ वर्षीय रामजनम मुखिया र वीरगञ्ज महानगरपालिका-३१ का २४ वर्षीय सुनिल दास थारू मोटरसाइकल चोरीको आरोपमा समातिएका हुन् ।

उनीहरुले गत कात्तिक ७ गते वीरगंज-१४ का प्रधुमन कुमारको पार्किङ गरी राखेको वाग्मती प्रदेश ०३–००३ प ३६७८ नम्बरको २२० सिसिको पल्सर मोटरसाइकल चोरेर फरार भएको जिल्ला प्रहरी कार्यालय पर्साका प्रहरी नायव उपरीक्षक दिपक गिरीले जानकारी दिए ।

उनका अनुसार मोटरसाइकल खोजी गर्ने क्रममा गत शुक्रबार परवानिपुरमा भेटिएपछि प्रहरीले नियन्त्रणमा लिएकाे थियो । मोटरसाइकलसहित दुवै जनालाई समातेर जिल्ला प्रहरी कार्यालय पर्साबाट थप अनुसन्धान भइरहेको डिएसपी गिरीले बताए ।