गोप्य टोलीले निकाल्यो चुनावी जित–हारको यस्तो हिसाब

अरुका हकमा मत सर्वेक्षणजस्ता निर्वाचन परिणाम प्रभावित हुने गतिविधिमा रोक लगाएको निर्वाचन आयोगभित्रै आयुक्तका बीच आगामी परिणामबारे विभिन्न कोणबाट चर्चा–परिचर्चा हुने गरेको छ ।

देशभरि निर्वाचनसँग सम्बन्धित गतिविधिको सूक्ष्म अध्ययन र जनमतको पूर्वानुमान गरी नतिजा विश्लेषणनिम्ति सेना, प्रहरी र गुप्तचरको डिआइजी तहका हाकिम संलग्न एउटा बेग्लै र गोप्य टोली अस्ति २० गतेदेखि आयोगमा क्रियाशील छ । एकजना उच्चपदस्थ कर्मचारीले जनआस्थालाई बताएअनुसार, यसचोटिको निर्वाचनबाट वामपन्थीहरूको ०७४ मा प्राप्त जनमत घटेर त्यसको ठाउँमा नेपाली कांग्रेस अगाडि आउने देखिन्छ ।

०७४ मा वामपन्थीलाई प्राप्त भोट ६३ देखि ६५ प्रतिशत थियो । अहिले घटेर ६०/६२ पुग्ने सम्भावना छ । विभाजनको असर या अरु शक्ति जन्मिएको कारण त्यस्तो प्रक्षेपण गरिएको हो । अर्थात्, कम्युनिष्टहरूको कलहका कारण १०–१२ लाख भोट घट्ने अनुमान छ । उनीहरूका अनुसार, प्रत्यक्षतर्फको सीट संख्यामा ६१ बाट घटेर ५० प्रतिशत पुग्न पनि मुश्किल छ । यसरी चुनावपछि सबै वाम एक भए भने पनि संसदमा बहुमत पुग्ने देखिँदैन । एमाले दोस्रो र माओवादी तेस्रो हुने पक्का छ । चौथोमा जसपाको सम्भावना छ । नेमकिपा र जनमोर्चाले तीन प्रतिशतको थ्रेस होल्ड कटाउने सम्भावना छैन ।

उनीहरूले प्रत्यक्षतर्फ ९–१० सिट जिते पनि एकीकृत समाजवादीलाई थ्रेस होल्ड कटाउन मुश्किल देखिरहेका छन् । राप्रपाले तीन प्रतिशत कटाउन सक्छ । कांग्रेस उम्मेदवारी दिएका ९२ मध्ये ६०÷६२ सीट जित्नेतिर हिँड्दै छ । समानुपातिकबाट ४०–४२ गरी सय हाराहारीमा कुल सिट ल्याउने अनुमान छ ।

मतदाता बढे पनि तिनको मतदाताको प्रवृत्ति पुरानै छ । कर्मचारी, कैदी, बन्दीले समानुपातिकमा मतदान गर्न पाउने भएपछि ४–५ लाख मत कांग्रेस–एमालेले थप्ने स्थिति रहन्छ । थ्रेसहोल्ड कटेपछि १ लाख १२ हजारदेखि १६ हजारमा एक सीट आउने हो । एमालेले समानुपातिकबाट ४२–४५ सीट ल्याउने निर्वाचन आयुक्तहरूको अनुमान छ । माओवादीको प्रत्यक्षतर्फ करिब २५ पुग्ने देखिन्छ ।

शहरी जनमत माओवादीअनुकूल छैन । काठमाडौंमा एमालेले जितिहालिन्छ भन्ने ढुक्क भएका जम्मा दुई ठाउँ हुन्, क्षेत्र नं. २ र ९ । त्यहीं माओवादीले उम्मेदवारी पाएको छ । मुख्य नेतामा प्रचण्ड, शेरबहादुर देउवा, माधव नेपाल, केपी ओलीले जित्ने निश्चितझैँ छ । तर, इलामबाट झलनाथ खनाल र सुवास नेम्वाङ दुवै खतरामा छन् । ताप्लेजुङमा योगेश भट्टराईको सम्भावना छ । जनमोर्चालाई बाग्लुङमा जित्न सजिलो छ । कांग्रेसको भोट माओवादी र जनमोर्चालाई जान गाह्रो छ । गठबन्धनको ३० प्रतिशत मत राम्ररी ट्रान्सफर नहुने अनुमान लगाइएको छ ।

प्रत्यक्षमा स्वतन्त्रलाई हालेको भोट समानुपातिक प्रणालीमा सहभागीे दलतिर गए पनि कांग्रेस, एमाले, माओवादी, राप्रपाजस्ता पार्टीले पाउने सम्भावना छैन । हाम्रो नेपाली पार्टी, स्वतन्त्र पार्टीजस्ता नयाँ–नयाँ जन्मिएका पार्टीमध्येले त्यस्तो भोट तान्ने अवस्था छ । जस्तो कि, रवि लामिछानेको स्वतन्त्र पार्टीले प्रदेशतर्फ उम्मेदवारी दिएको छैन । उसलाई भोट हाल्ने मान्छेले प्रदेशमा जोसँग तालमेल छ, उसैलाई हाल्छन् । नेपाल आमा पार्टी, लौरो अभियानहरूमा पनि भोट जान सक्छ ।

यसचोटिको निर्वाचनमा राम्रो पक्ष भनेको मत बदरको खतरा कम हुनु हो । किनभने, निर्वाचन आयोगले जहाँ जुन दलका उम्मेदवार छैनन्, त्यहाँ ती दलका चुनाव चिह्न समावेश नगरी सानो मतपत्र तयार पारेको छ ।