पार्टी प्रवेश नगरे बारीको कोदो फाँडिदिने एमालेको चेतावनी

रामेछापमा एमालेका स्थानीय नेता तथा कार्यकर्ताले पार्टी प्रवेश नगरे बारीको कोदो फाँडिदिने चेतावनी दिएका छन् । मन्थली नगरपालिका १० मा एमाले वडा कमिटी अध्यक्षसहितको समूहले स्थानीय सुवास थापाको बारीमा गएर एमाले प्रवेश नगरेको भन्दै काँचो कोदो टिपेका हुन् ।

उनीहरुले अब पनि पार्टी प्रवेश नगरे बारीमा लगाइएको कोदो सबै नष्ट गरिदिने धम्की दिएको थापाले बताएका छन् । पीडितका अनुसार पूर्वअध्यक्ष भरतबहादुर बोहोराले एमाले प्रवेशको निम्ति आग्रह गर्दै आएका छन् ।

‘प्रवेश नगरे नराम्रो हुन्छ भन्दै बारम्बार धम्क्याउँदै आएका छन्,’ उनले भने । हिजो शनिबार बारीमा गएर काँचो कोदो टिप्दै अझ पनि एमाले प्रवेश नगरे नराम्रो हुने धम्की दिएको उनको भनाइ छ । यसअघि पनि बोहोराले पटक पटक त्यसो भनेको थापाले बताए ।

पीडित सुवासले आफ्नो फेसबुक पेजमा ‘न्याय दिलाइदिन’ आग्रह गर्दै इस्ट्याट्स लेखेका छन् ।