दरबार होटलबाट सुनको गहना चोर्ने चोर दाङमा पक्राउ

दाङ प्रहरीले चोरीमा संलग्न रहेको आरोपमा एक जनालाई पक्रेको छ । हिजो साँझ तुलसीपुर उपमहानगरपालिका–१०, सुकौराबाट गरगहना र पैसा चोरेको आरोपमा उनलाई प्रहरीले नियन्त्रणमा लिएको हो ।

पक्राउ पर्नेमा बाँके खजुरा गाउँपालिका–२ सि गाउँ बस्ने ४२ वर्षीय राजेन्द्र सुनार हुन् । उनको साथबाट चोरीका विभिन्न १६ थान गरगहना र ४४ हजार तीन सय एक रूपैयाँ बरामद गरिएको प्रहरीले जनाएको छ ।

शंकास्पद रूपमा बसिरहेका राजेन्द्रलाई इलाका प्रहरी कार्यालय तुलसीपुरबाट खटिएको टोलीले जाँच गरेको र सोही क्रममा उनको झोलामा गरगहना र नगद फेला परेको बताइन्छ । पक्राउ परेका सुनारले उक्त धनमाल नेपालगञ्जस्थित पुष्पलाल चोकमा रहेको दुल्लु दरबार होटलबाट चोरेर ल्याएको सकारेका हुन् ।