चुनावको सुरक्षाबारे कुरा गर्न प्रधानसेनापति निर्वाचन आयोगमा

पर्सि आइतबार हुने प्रतिनिधि सभा तथा प्रदेश सभा सदस्य निर्वाचनको सुरक्षा व्यवस्थापनका विषयमा छलफल गर्न प्रधान सेनापतिसहितको टोली निर्वाचन आयोग पुगेको छ । प्रमुख आयुक्त दिनेशकुमार थपलिया र आयुक्तहरूसँग प्रधानसेनापति प्रभुराम शर्मासहितको टोलीले भेटवार्ता गरेको बताइएको छ ।

आयोगको कान्तिपथस्थित कार्यालयमा भएको भेटमा प्रधानसेनापति शर्माले निर्वाचन सुरक्षाका लागि नेपाली सेनाले गर्दै आएको काम कारवाहीबारे अवगत गराउनुभएको हो । उहाँले हालसम्मको स्थलगत निरीक्षण र प्राप्त सूचनाका आधारमा निर्वाचनको सुरक्षा चुस्त रहेको जानकारी गराउनुभएको आयोगले जनाएको छ । 

निर्वाचन सुरक्षित वातावरणमा सम्पन्न गराउन सेनाका तर्फबाट खेल्नुपर्ने भूमिका निर्वाह गर्न तयार रहेको प्रधान सेनापति शर्माले जानकारी गराउनुभएको हो ।

भेटमा निर्वाचन आयुक्तहरू ईश्वरीप्रसाद पौड्याल, रामप्रसाद भण्डारी र सगुन शम्सेर जबराको उपस्थिति थियो । निर्वाचनको तयारी, निर्वाचन आचारसंहिताको पालना र निर्वाचन सुरक्षाका क्रममा नेपाली सेनाबाट उल्लेखनीय सहयोग प्राप्त भएको आयोगको भनाइ छ ।