ओलीको हातबाट बधाई थाप्न जितेका मात्र नभई हारेका पनि काठमाण्डौ ओइरँदै

नेकपा (एमाले)का अध्यक्ष केपी शर्मा ओलीले निर्वाचित सांसदहरुलाई भोलि बधाई दिनुहुने भएको छ । प्रज्ञा प्रतिष्ठानमा आयोजित कार्यक्रममा उहाँले चुनाव जितेका आफ्ना सांसदहरुलाई खादा ओढाउन लाग्नुभएको हो । 

एमालेले निर्वाचित सांसदहरुका लागि कार्यक्रमको आयोजना गरेको छ । तर हारेकाहरु पनि कार्यक्रममा उपस्थित हुने देखिएको छ । कार्यक्रममा सहभागी हुन हारेकाहरु समेत धमाधम आफ्नो गृहजिल्लाबाट काठमाडौं भित्रिँदै छन् । 

कैलालीबाट चुनाव लडेका तर पराजित पूर्वमन्त्री नारदमुनि राना र कञ्चनपुरबाट हारेकी निरुदेवी पाल धनगढीबाट आज बेलुका राजधानीतिर प्रस्थान गरेका छन् । गेटा विमानस्थलमा देखिएका उनीहरु श्री एयरको नियमित उडानबाट काठमाडौं आउन लागेका हुन् । 

त्यस्तै,नेकपा माओवादी केन्द्रबाट रामबहादुर थापा (बादल) संगै एमालेमा बसेका लेखराज भट्ट पनि धनगढीबाट काठमाडौं उडेका छन् ।  उनी पनि कैलालीबाट पराजित उम्मेदवार हुन् ।

माओवादी अध्यक्ष पुष्पकमल दाहाल (प्रचण्ड) की बुहारी बीना मगरलाई दोब्बर मतान्तरले कन्चनपुरबाट हराउने पूर्व प्रादेशिक आर्थिक मामिलामन्त्री तारा लामा तामाङ्ग पनि एक छिनमा राजधानी आउँदैछन् ।