समातिएका जर्नेललाई अस्पतालमा जँचाएर फर्काइयो जङ्गीअड्डाकै हिरासतमा

अस्ति मंगलबार दिउँसो सैनिक मुख्यालय, भद्रकालीबाट सैनिक प्रहरीले नियन्त्रणमा लिएका जर्नेल प्रेम शाहीलाई सैनिक अस्पताल छाउनी पुर्याएर हिजै मुख्यालयस्थित सैनिक प्रहरीको हिरासतमा फर्काइएको छ । मुख्यालयभित्रको हिरासत कक्षमा राखिएका शाहीलाई स्वास्थ्य परीक्षणको निम्ति हिजो बिहान छाउनी अस्पतालमा लगिएको थियो ।

‘जर्सा"बलाई छाउनी अस्पताल लगेर हिजो सैनिक मुख्यालय फिर्ता गरिएको छ । आकस्मिक तनावका कारण मुटुको धढ्कन बढेको र अप्ठेरो महसुस भएको गुनासोपछि पूरै स्वास्थ्य परीक्षणको लागि हिजो छाउनी लगिएकोमा सबै चेकअपपछि चिकित्सकले ठीक छ भनेर हिजो फर्काइएको छ,’ सैनिक स्रोतले उनको उपचार र हिरासतबारे जानकारी दिँदै भनेको छ ।

हिजो बिहान शाहीका श्रीमती र छोरीले उनलाई अस्पताल पुगेर भेटेका थिए । 

यसअघि प्रधान सेनापति पूर्णचन्द्र थापाको कोर टीमका चार जनामध्ये शाही पनि एक रहेको सेनाभित्र त्यतिबेलै चर्चा चलेको थियो । उनी कोरियन हतियार खरिदमा समेत संलग्न रहेको बताइन्छ । के सिरिजको कोरियन हतियार ल्याउने मुख्य पात्र पूर्व सञ्चार मन्त्री ज्ञानेन्द्रका फिल्म अभिनेता भाइ लोकेन्द्र कार्कीसँग मिलेर शाहीले त्यतिबेलै उधुम मच्चाएको भनिन्छ ।  मधुकर कार्की,अनन्त कार्की,गोकुल भण्डारी,माधव थापा,सुवास थापा त्यतिबेलाका हर्ताकर्ता मानिन्थे । 

तीमध्ये अनन्त अवकाश पाएर घर गएका छन् । मधुकर एनडीसी तालिममा परेनन् भने शाही अवकाशको अघिल्लो दिन सैनिक थुनामा परेका छन् ।