समातिन्छन् र पनि लागुऔषध ओसार्न डराउन्नन्

लागुऔषधसहित दुई जना समातिएका छन् । सशस्त्र प्रहरी बल,नेपाल बोर्डर आउट पोष्ट, महिनाथपुरबाट सहायक निरीक्षक गोविन्द चौधरीको कमाण्डमा खटिएको तीन जना र ठाडीबाट गएको प्रहरी टोलीले लागुऔषध ओसारपसार गर्ने क्रममा दुई जनालाई रंगेहात पक्राउ गरेको हो । 

पक्राउ पर्नेमा धनुषाका खालिल राईन र गुड्डु आलम रहेका छन् । टोलीले धनुषाको बिदेह नगरपालिका वडा नम्बर १ महिनाथपुर नाकाबाट खालिल र गुड्डुलाई समातेको हो । भारतबाट नेपाल आउँदै गरेको प्र.२.०२.००४प६३१५ नम्बरको पल्सर मोटरसाइकल शंका लागेर चेकजाँच गर्दा पछाडि सवार खलिलले लगाएको हाफ ज्याकेटको भित्रपट्टी पेटीमाथि बाँधेको प्लास्टिकको झोलाबाट लागुऔषध बरामद भएको प्रहरीले जनाएको छ । 

उनको साथबाट डाईजेपाम ईन्जेक्सन ७५ वटा,फेनारगन ईन्जेक्सन ७० वटा र आईपीपी एल ईन्जेक्सन ७५ वटा फेला परेको छ । त्यस्तै, मोटरसाइकल चालक गुड्डुलाई समेत नियन्त्रणमा लिएर ईलाका प्रहरी कार्यालय, खजुरीमा बुझाएको बताइएको छ ।

सशस्त्र प्रहरी निरीक्षक गणेशदल पाण्डेयले जिम्मेवारी सम्हालेपश्चात अवैध कार्यहरुमा उल्लेख्य कमि आएको स्थानीयले बताएका छन् ।