सर्वोच्च अगाडि न्यायाधीशकी पत्नीको हारगुहार, कपाल फिँजाएर प्रदर्शन

आफ्नै श्रीमानबाट यौनहिंसामा परेकी न्यायाधीश भुवन गिरीकी पत्नी आरती गिरीले आज सर्वोच्च अदालत अगाडि विरोध प्रदर्शन गरेकी छन् । न्यायाधीश गिरीलाई कारबाही नगरी न्यायालयको कुर्सीमा राखेको भन्दै उनले कालो कपडा लगाएर कपाल फाल्दै प्रर्दशन गरेकी हुन् । 

उनले न्यायाधीश गिरीलाई तत्काल पक्राउ गरी कारबाही प्रकिया अघि बढाउन माग गरेकी छन् । आरतीलाई साथ् दिन प्रदर्शनमा आएकी बिनु यादवले आफूहरु पटक–पटक न्यायका लागि न्यायपरिषद्मा गए पनि मुद्दा दर्ता नगरिएको र पीडितका कुराहरुको सुनुवाइ नभएको जिकिर गरिन् । 

उनले आफ्ना मागहरु सुनुवाइ नगरे विरोध प्रदर्शनलाई थप सशक्त बनाउने चेतावनीसमेत दिएकी छन् । यादवले आफू पटक–पटक काका ससुराबाट बलात्कारको प्रयासमा परेपनि हालसम्म उनलाई कारबाही नगरिएको भन्दै चर्को असन्तुष्टि जनाइन् ।

 त्यस्तै, प्रदर्शनमा सहभागी कृतिका यादवले नेपालको न्यायालयमा न्यायाधीश नै बिक्ने गरेको आरोप लगाइन् । उनले आरोपित गिरीविरुद्धको ‘कम्प्लेन’ नै न्याय परिषद्ले लिन नमानेको बताइन् ।जिल्ला प्रहरी कार्यालय कपिलवस्तुमा न्यायाधीश गिरीमाथि वैवाहिक बलात्कार र घरेलु हिंसाको जाहेरी छ ।