दाङमा पनि ग्यास सिलिण्डर पड्कियो, दुई जना घाइते

दाङमा खान पकाउने ग्यास सिलिण्डर पड्केको छ । तुलसीपुर उपमहानगरपालिका १६, लहलौरामा सिलिन्डर पड्किँदा दुईजना जलेर सख्त घाइते भएको बताइएको छ । स्थानीय कृषि बीऊ उत्पादन कम्पनीमा बिहान खाना पकाउने क्रममा सिलिण्डर पड्केको हो । उक्त दुर्घटनामा ५० वर्षीय कुसुम केसी २९ वर्षीय आशिष खनाल घाइते भएका छन् । 

केसीको शरीरको तल्लो भाग धेरै भाग जलेको छ भने खनालको हातगोडा सबै जलेको छ । केसीलाई थप उपचारार्थ नेपालगञ्ज पठाइएको छ भने चितवन निवासी खनाल थप उपचारको निम्ति भरतपुर गएको बताइएको छ । इलाका प्रहरी कार्यालय तुलसीपुरका अनुसार खाना पकाउने क्रममा ग्यास चुहिएर सिलिन्डर पड्किएको हो ।

यता गए राति राजधानीमा ग्यास सिलिण्डर पड्केर घाइते भएका सांसद चन्द्र भण्डारीलाई थप उपचारको निम्ति श्रीएअरलाइन्सको विमानमा मुम्बई लगिएको छ । घाइते उनकी वृद्धा आमाको उपचारको क्रममा निधन भएको छ ।