नवनिर्वाचित राष्ट्रपतिलाई बधाईको ओइरो

नवनिर्वाचित राष्ट्रपति रामचन्द्र पौडेललाई विश्वका विभिन्न मुलुकका राष्ट्राध्यक्षहरुले बधाई दिने क्रम जारी छ । गत बिहीबार साँझ मुलुकको तेस्रो राष्ट्रपतिमा निर्वाचित भएसँगै अन्तर्राष्ट्रिय क्षेत्रबाट बधाईको ओइरो आइरहेको बताइएको छ ।

भोलि पदको शपथ र कार्यभार थाल्ने तयारीमा रहनुभएका पौडेललाई छिमेकी मित्रराष्ट्र पाकिस्तानबाट पनि बधाई आएको हो । उहाँलाई पाकिस्तानी समकक्षी डा. अरिफ अल्भीले बधाई सन्देश पठाउनुभएको छ ।

नेपालका नवनिर्वाचित राष्ट्रपतिलाई बधाई दिँदै डा. अल्भीले उहाँको कार्यकालमा दुई मुलुकबीच कायम रहेको मैत्रीपूर्ण सम्बन्ध थप प्रगाढ हुने विश्वास लिनुभएको छ । पाकिस्तानी राष्ट्रपतिले नेपाली समकक्षीसँग मिलेर दुई देशबीचको सम्बन्धलाई थप मजबुत बनाउने चाहनसमेत बधाई सन्देशमा उल्लेख गर्नुभएको बताइएको छ ।