एमाले नेतृत्वका प्रदेश सरकारहरु धरापमा, कोशीमा माओवादीले तत्काल निर्णय नगर्ने

केन्द्रमा सत्ता समीकरणमा फेरबदल भएसँगै प्रदेश सरकारहरु धरापमा पर्न थालेका छन् । संघीय सरकार छाडेर प्रतिपक्षमा बसेको एमालेले प्रदेशमा सत्ता साझेदार दलहरुले समर्थन गुमाएपछि ती सरकारहरु धरापमा परेका हुन् । 

माओवादीसहित त्यतिबेलाको सातदलीय गठबन्धनका दलहरुको समर्थनमा एमालेले चारवटा प्रदेशमा मुख्यमन्त्री पाएको थियो । तीमध्ये नागरिक उन्मुक्ति पार्टीले विश्वासको मत नदिएका कारण एमाले नेतृत्वको सुदूरपश्चिम सरकार यसअघि नै ढलिसकेको छ भने गण्डकी र लुम्बिनी सरकार अल्पमतमा परेका छन् । 

माओवादी केन्द्र र जनमत पार्टी एमाले नेतृत्वको लुम्बिनी सरकारबाट बाहिरिएपछि मुख्यमन्त्री लिला गिरीले बहुमत गुमाएका छन् । प्रदेश सरकारमा माओवादीबाट जोखबहादुर महरा, इन्द्रजित चौधरी र कृष्णा केसी र जनमतका सीके गुप्ता मन्त्री थिए । उनीहरुले आज मन्त्री पदबाट राजीनामा दिएका हुन् । 

अस्ति गण्डकीमा खगराज अधिकारी नेतृत्वको सरकारमा सहभागी माओवादीका दुई जना मन्त्रीले राजीनामा दिएका थिए । माओवादी संसदीय दलका नेता हरिबहादुर चुमान भौतिक पूर्वाधारमन्त्री र तथा सांसद रेसमबहादुर जग्जाली उद्योग पर्यटन, वन तथा वातावरणमन्त्री थिए । उनीहरुले राजीनामा दिएपछि अधिकारी नेतृत्वको सरकार अल्पमतमा परेको हो ।

कोशी प्रदेशमा भने माओवादीले तत्काल सरकार नछाड्ने बताउँदै आएको छ । प्रदेशको नामकरणको विवादले त्यहाँको राजनीति बिथोलिएकाले माओवादी तत्काल नयाँ समीकरण बनाउने पक्षमा देखिएको छैन । तर प्रदेशसभाको अंक गणितले एमाले सरकार जोगिने सम्भावना अत्यन्तै न्यून छ ।