विनोद चौधरीलाई कारबाहीसँगै १० अर्बको रोडम्याप

काठमाडौंका मेयर बालेन साहले जथाभावी डोजर चलाएको घटनाबाट पाठ सिक्दै ललितपुर महानगरका मेयर चिरिबाबु महर्जनले सर्प मर्ने,लठ्ठी पनि नभाँचिने योजना बनाएका छन् । उनले भोलि सोही योजनालाई मूर्तरुप दिन सरोकारवालाहरुबीच भेला बोलाएका छन्  ।

‘भोलि हाम्रो महानगरले नगरक्षेत्रमा बनाइएका मापदण्डविपरितका संरचना भत्काउनेबारे महत्वपूर्ण छलफल गर्दैछ । काठमाडौं महानगर, टोखा नगरपालिका, स्ट्रक्चरल इञ्जिनियरहरु र विज्ञहरुबीच २ बजे छलफल डाकिएको छ । त्यसमा सर्वसाधारण पनि खुशी हुने,महानगरलाई पनि आर्थिक स्रोतको जोहो हुने योजना बनाइने छ,’महानगरपालिका स्रोतले भनेको छ ।

भोलिको छलफलले भवन अभिलेखीकरण कार्यविधिलाई अन्तिम रुप दिन सहयोगी भूमिका निभाउने बताइन्छ । कार्यविधिमा कम्तीमा तीन सय प्रतिशत जरिवाना लिएर मापदण्ड विपरितका संरचनालाई नियमन गर्न म्याद दिने तयारी मेयर महर्जनको छ । यसो गर्दा सक्नेलाई नियमित गराउने र नियमनमा नआउनेलाई कारवाही गर्ने बाटो खुल्ने उनको बुझाइ छ ।

महानगरमा विशेषगरी साढे २ तला भनेर तीन तला बनाइएको,टप नभएको ठाउँमा टप राखिएको र सेड ब्याक मिचेर भवन बनाइएको समस्या सबैभन्दा धेरै पाइएको स्रोतको दाबी छ । यस्तो अवस्थामा नयाँ कार्यविधि कार्यान्वयन गर्दा महागनरले झण्डै १० अर्ब आम्दानी हुने लक्ष्य राखेको बताइन्छ । कार्यविधि पहिले मूल बाटोमा, त्यसपछि भित्रीबाटो र गल्लीका भवनमा पनि लागू हुनेछ । 

यसैबीच डलर अर्बपति विनोद चौधरीको समिट अपार्टमेण्टले सहरी विकास मन्त्रालयबाट प्लानिङ परमिट मात्रै लिएको तर महानगरबाट कुनै स्वीकृति नलिएको सम्बन्धमा हदैसम्मको कारवाहीको निम्ति आज महानगरको कार्यालय पुल्चोकमा बोलाइएको छ । 

लापरबाहीको पराकाष्ठा गर्दै निर्माण थालिएको नजिकैका दुई वटा घर ध्वस्त भएका छन् । अन्य आठ वटा घरमा क्षति पुगेको छ । एउटा घरको भुईं तल्ला जमिनमुनि भासिएकाले वास्तविकता बुझ्न चौधरीको कम्पनीका प्रतिनिधिलाई आज पुल्चोक बोलाइएको छ । कानुनसम्मत ढंगले उनले स्थानीयलाई चित्त बुझाउनुपर्ने महानगरको भनाइ छ । तर निर्माण स्वीकृतिमा महागनरपालिकालाई बाइपास गरेकाले हदैसम्मको कारबाही र जरिवाना गरिने बताइन्छ ।