ट्रयाक्टरमा च्यापिएर तीन जनाको प्राणान्त

मकवानपुरको मनहरी गाउँपालिका ३, कालिदमारस्थित सडकमा ट्रयाक्टर दुर्घटना हुँदा तीन जनाको मृत्यु भएको छ । गएराति मिलडाँडाबाट हाँडीखोलातर्फ जाँदै गरेको ट्याक्टर पल्टँदा उनीहरुको च्यापिएर निधन भएको बताइएको छ ।

अनियन्त्रित भएपछि ट्रयाक्टर पल्टेको प्रहरीको अनुमान छ । मधेश प्रदेश ०३–००१ त ७१८८ नम्बरको ट्रयाक्टर पल्टिएको जिल्ला प्रहरी कार्यालय मकवानपुरले जनाएको छ । 

ट्रयाक्टरमा रहेका पाँच जनामध्ये मनहरी गाउँपालिका ३, हाँडीखोला बस्ने राजकुमार प्रजा, सोही वडाका वीरमान रुम्बा र मनहरी ४, सालघारीका प्रविण प्रजाको मृत्यु भएको छ । पल्टेको ट्रयाक्टरले च्यापेपछि एक जनाको घटनास्थलमा र बाँकी दुईको हेटौँडास्थित चुरेहिल अस्पतालमा उपचारको क्रममा मृत्यु भएको मनहरी गाउँपालिका ३ का वडाध्यक्ष अनन्तप्रकाश अर्यालले बताए ।

सोही ट्रयाक्टरमा यात्रारत अमृत प्रजा र जोखमान प्रजाको हेटौँडामा उपचार भइरहेको छ । उनीहरुमध्ये एक जनाको स्वास्थ्य अवस्था निकै गम्भीर रहेको पनि वडाध्यक्ष अर्यालले जानकारी दिएका छन् ।