लुम्बिनीका मुख्यमन्त्रीलाई विश्वासको मत प्राप्त, राप्रपा तटस्थ बस्दा एमाले विपक्षमा
लुम्बिनी प्रदेशका नवनियुक्त मुख्यमन्त्री डिल्लीबहादुर चौधरीले प्रदेशसभाबाट विश्वासको मत प्राप्त गरेका छन् ।
वैशाख १४ गते मुख्यमन्त्रीमा नियुक्त भएका चौधरीले आज आफूलाई प्रदेशसभाको विश्वास छ भनि राखेको प्रस्तावको पक्षमा ५३ र विपक्षमा २९ मत परेको हो ।
कांग्रेस लुम्बिनी प्रदेश संसदीय दलका नेतासमेत रहेका मुख्यमन्त्री चौधरीलाई सत्ता साझेदार माओवादी केन्द्र, नागरिक उन्मुक्ती पार्टी, जनता समाजवादी पार्टी, लोकतान्त्रिक समाजवादी पार्टी, जनमत पार्टी, नेकपा एकीकृत समाजवादी, राष्ट्रिय जनमोर्चा र स्वतन्त्र सांसदले विश्वासको मत दिए ।
एमालेका २९ सांसदले विपक्षमा मतदान गर्दा चार सिट रहेको राप्रपा भने तटस्थ बसेको छ ।
गत वैशाख ११ गते विश्वासको मत नपाएपछि एमालेका लिला गिरी नेतृत्व सरकार ढलेपछि सत्तारुढ दलको समर्थनमा चौधरी मुख्यमन्त्री नियुक्त भएका हुन् । शुक्रबार मुख्यमन्त्रीको पद तथा गोपनीयताको शपथ लिएका चौधरीले आइतबार प्रदेशसभा सचिवालयमा विश्वासको मत लिनेसम्बन्धी प्रस्ताव दर्ता गरेका थिए ।
८७ सदस्यीय लुम्बिनी प्रदेशसभामा बहुमतका लागि ४४ सांसदको समर्थन आवश्यक पर्छ ।
टिप्पणीहरू