गुडिरहेको ट्रक घरमा ठोक्किँदा तीनको मृत्यु, पाँच घाइते

सडक छेउको घरमा ट्रक ठोक्किँदा तनहुँमा ठूलो मानवीय क्षति भएको छ । बन्दीपुर गाउँपालिका ५, याम्पा आँधीखोलामा सडकमा गुडिरहेको ट्रक घरमा ठोक्किँदा तीन जनाको मृत्यु भएको बताइएको छ ।

दुर्घटनामा पाँच जना गम्भीर घाइते भएका छन् । घाइते सबैको चितवनस्थित पूरानो मेडिकल कलेजमा उपचार भइरहेको जिल्ला प्रहरी कार्यालय, तनहुँले जनाएको छ । 

आज बिहान ९ बजेर २० मीनेटमा घरमा ट्रक ठोक्किएको प्रहरी नायव उपरीक्षक (डिएसपी) मोहनबहादुर खाँणले बताए । ना. ४ ख १९७३ नम्बरको ट्रक अनियन्त्रित भई घरमा ठोक्किन पुगेको उनको भनाइ छ । 

ट्रक चालक प्रहरीको नियन्त्रणमा रहेको उल्लेख गर्दै उनले यसबारे थप अनुसन्धान भइरहेको जानकारी दिए ।