एक वर्षको प्रगति विवरण सार्वजनिक गर्दै चौदण्डीगढीका मेयर भन्छन्,‘लौं जाँचौं हाम्रो काम’
उदयपुरको ऐतिहासिक चौदण्डीगढी नगरपालिकाका जनप्रतिनिधिहरुले एक वर्ष कार्यकालको समिक्षा तथा प्रगति विवरण सार्वजनिक गरेका छन् ।
‘सुन्दर समृद्ध नगर बनाउने अभियान, हरेक नगरवासीको मुहारमा मुस्कान’ भन्ने नारासहित जनप्रतिनिधिहरुले आफ्नो एक वर्ष कार्यकालको समिक्षा तथा प्रगति विवरण सार्वजनिक गरेका हुन् ।
कार्यक्रमलाई सम्बोधन गर्दै नगरप्रमुख कालुमान लामाले जनतासमक्ष निर्वाचनको बेला गरेका वाचाहरु पूरा गर्न नसकेको बताए ।
स्थानीय सरकारप्रति जनताको अपेक्षा धेरै भएको उल्लेख गर्दै उनले स्रोतसाधनको अभावका कारण सोचेजस्तो काम हुन नसकेकोमा दुःखेसो पोखेका छन् ।
संघको केन्द्रीकृत नीति तथा कार्यक्रमले गर्दा स्थानीय सरकार मर्कामा परेको बताउँदै उनले भने,‘एकातिर बजेटको अभाव छ । संघको नीतिअनुसार हामी चल्नुपर्छ । अनि कसरी जनताले सोचेअनुसारको विकास गर्न सक्छौं ? देशको समृद्धि चिताउने हो भने स्थानीय सरकारलाई बलियो बनाउने गरी बजेट दिनुपर्छ ।’
त्यस्तै, उनले आफ्नो एक वर्षको कार्यकालमा भएका कामहरुको जाँच गर्न पनि जनतासमक्ष आग्रह गरेका छन् । सम्मेलनमा पालिकाले एक वर्षमा सम्पन्न गरेर कामहरु श्रव्यदृश्यमार्फत देखाएको थियो ।
चौदण्डीगढी रानीटार सडक, वडा जोड्ने सडक कालोपत्रे, १३ किलोमिटर नयाँ सडक ट्रयाक, सात वटा मोटरेवल पुल, शहरबत्ती, दुई सय २४ विद्यालय भवन, ट्रष्ट भवन, ६ सिँचाइ आयोजना, बजारको दुई किलोमिटर ग्राभेल सडक, १० खानेपानी योजना, तीन स्थानमा तटबन्धका काम नगरपालिकाले सकाएको छ ।
त्यस्तै, नौं वटा डिपबोरिङ्ग, कृषि, शिक्षा, स्वास्थ्यलगायत नगर विकासको लागि सडक यातायातको गुरुयोजना, पाँच वर्षीय आवधिक योजना पनि सम्पन्न भएको जनाइएको छ । यता, उपप्रमुख मणिका दुलालले न्यायिक समिति र अनुगमनको बारेमा आफ्नो अनुभव सुनाइन् ।
टिप्पणीहरू