विद्यालयहरुले असार १५ गतेभित्र आईएमआईएस अद्यावधिक गरिसक्नुपर्ने

शिक्षा तथा मानव स्रोत विकास केन्द्रले विद्युतीय एकीकृत शैक्षिक व्यवस्थापन सूचना प्रणाली (आईएमआईएस) अद्यावधिक गर्न निर्देशन दिएको छ । 

मुलुकभरका स्थानीय तहलाई आज परिपत्र गर्दै केन्द्रले सबै प्रकार र तहका विद्यालयलाई शैक्षिक सत्र २०८० को आईएमआईएस आगामी असार १५ गतेभित्र अद्यावधिक गर्न भनेको हो । 

विद्यालय शिक्षासँग सम्बन्धित तथ्यांक र सूचना बेवसाइट बेस्ड सिस्टममा व्यवस्थापन गरी तिनको संकलन, एकीकरण, विश्लेषण, प्रतिवेदन तयारी, प्रबोधीकरण र प्रकाशन गर्दै सोका आधारमा केन्द्रले योजना निर्माण, कार्यान्वयन, अनुगमन तथा मूल्याङ्कनका कार्य गर्दै आएको छ । 

त्यस्तै, शैक्षिक सत्रको सुरु र अन्त्य गरी प्रत्येक शैक्षिक सत्रमा दुई पटक अनलाइन अद्यावधिक गर्ने गरिन्छ । 

केन्द्रले सूचना अद्यावधिक गर्दा मोन्टेरी र ईसीईडीदेखि कक्षा १२ सम्म सञ्चालन भएका विद्यालयले आ-आफ्नो विद्यालयको एक्सल बेस्डको आईएमआईएस अनिवार्य रुपमा अद्यावधिक गर्ने तथा नयाँ विद्यालय भए निर्धारित मितिभित्र स्थानीय तहमार्फत शिक्षा तथा मानव स्रोत विकास केन्द्रबाट विवरण भर्नुपर्ने जनाएको छ । 

कक्षा ११ र १२ मात्र सञ्चालन गरिरहेका विद्यालयलाई पनि अनिवार्य रुपमा विवरण अद्यावधिक गर्ने व्यवस्था मिलाउन भनिएको छ ।