बालकृष्ण र टोपबहादुरहरुको निम्ति १०७ जना वकिल
नक्कली भुटानी शरणार्थी प्रकरणमा पक्राउ परेका १८ जना आरोपितको पक्षमा बहस गर्न १०७ जना कानुन व्यवसायीले नाम लेखाएका छन् । हिजोदेखि काठमाडौं जिल्ला अदालतमा शुरु भएको थुनछेक बहसमा सरकारी वकिलहरुले आफ्नो धारणा,प्रमाण र तथ्य राख्न थालेका छन् ।
हिजो अबेरसम्म भएको बहसमा न्यायाधीश प्रेमप्रसाद न्यौपानेले सरकारी वकिलहरुलाई भोलि दिउँसो १ बजेसम्म बहस सकाउन समयसीमा निर्धारण गरिदिनुभएको छ ।
त्यसपछि विपक्षी १८ जनाको तर्फबाट कानुन व्यवसायीहरुले आफ्ना दलिल पेश गर्नेछन् । त्यसका लागि १०७ जना वकिलले नाम टिपाएको बताइएको छ । पूर्वगृहमन्त्री बालकृष्ण खाँणको तर्फबाट बहसका लागि सबैभन्दा धेरै २४ जना वकिल तयार छन् । टेकनाथ रिजालको पक्षमा १५ जना वकिलले नाम लेखाएका छन् ।
प्राप्त विवरणअनुसार टोपबहादुर रायमाझीको पक्षमा ११ जना, केशव दुलालको पक्षमा सात जना, टेकनारायण पाण्डेका लागि पाँच जना कानुन व्यवसायी बहसको निम्ति तयार देखिन्छन् ।
सन्दीप रायमाझीको पक्षमा चार जना,इन्द्रजित राईको तर्फबाट चार जना,नरेन्द्र केसीको तर्फबाट तीन जना,गोविन्द चौधरीको तर्फबाट तीन जना, हरिभक्त महर्जनका लागि दुई जना, आङटावा शेर्पाको तर्फबाट दुई जना र समशेर मियाँको निम्ति एक जना वकिलले नाम लेखाएको पाइएको छ ।
टेकनारायण पाण्डेको तर्फबाट राम घिमिरे, रमण श्रेष्ठ, जगत जोशी, गणेश रेग्मी र टोपबहादुर रायमाझीको निम्ति आकृति रायमाझी, सुशिल पन्त, रमेश बडाल, रामचन्द्र सुवेदी, धर्मराज जोशी, परशुराम कोइराला, ज्ञानेश्वर पराजुलीले बहस गर्ने बताइएको छ ।
टेकनाथ रिजालका कानुन व्यवसायीहरुमा श्यामबाबु केसी, प्रतिमा भट्टराई, डा. राजेन्द्र घिमिरे, अनिलकुमार लाल, डा. हिरा कार्की, राजेन्द्र पोखरेललगायत १५ जनाले नाम लेखाएका छन् ।
ट्रेन्डिङ पोस्ट
टिप्पणीहरू