जेठमा बाँड्नुपर्ने जेष्ठ नागरिकको पोषण भत्ताका लागि असारमा विवरण जुटाउँदै महानगर

काठमाडौं महानगरपालिकाले ज्येष्ठ नागरिकहरुलाई पोषण भत्ता वितरण गर्ने भएको छ । ७५ वर्षमाथिका ज्येष्ठ नागरिकलाई वार्षिक रुपमा एकमुष्ट वितरण गर्दै आएको भत्ता महानगरले वितरण गर्न लागेको हो । 

पोषणयुक्त खाना, औषधी, उपचारलगायतका खर्चका लागि महानगरपालिकाले ‘वरिष्ठ ज्येष्ठ नागरिक तथा पूर्ण अपाङ्ग पोषण भत्ता’ शीर्षकमा बजेट छुट्याउँदै आएको छ । ज्येष्ठ नागरिकहरुलाई वार्षिक १२ हजार रुपैयाँ र पूर्ण रुपमा अपाङ्गता भएकालाई तीन हजार रुपैयाँ दिने गरिएको छ । 

सबै वडा कार्यालयलाई पत्राचार गर्दै महानगरपालिकाले पोषण भत्ता वितरणका लागि विवरण पठाउन निर्देशन दिएको छ । २०७९ असार मसान्तसम्म ७५ वर्ष कटेका ज्येष्ठ नागरिकको नागरिकताको प्रतिलिपि, महानगरपालिकाको स्थायी बासिन्दा वा बसाइँसराई गरेर आएको प्रमाणको प्रतिलिपि र पूर्ण रुपमा अपाङ्गता भएकाको अपाङ्ग कार्डको प्रतिलिपि पेश गर्न भनिएको छ । 

पोषण भत्ता बैंकमार्फत वितरण गरिने महानगरपालिकाले जनाएको छ । सामाजिक सुरक्षा भत्ता लिइरहेका ज्येष्ठ नागरिकलाई सोही बैंक खातामा भत्ताबापतको रकम उपलब्ध गराइने उल्लेख गर्दै महानगरपालिकाले बैंक खाता नभएकाको हकमा खाता खोलेर भत्ता वितरण गर्न भनेको छ ।

आगामी असार १७ गतेभित्र महानगरपालिकाको सामाजिक विकास विभागमा विवरण पठाइसक्नुपर्ने जनाइएको छ । महानगरपालिकाले हरेक वर्षको बैशाखको अन्तिम र जेठको पहिलो सातामा भत्ता वितरण गर्ने गरेको थियो । तर, यसपटक भने भत्ता वितरणमा ढिलाइ भएको हो ।