जब अध्यक्ष एक्लै खान तम्सिए

मोरङ, बेलबारी ११ को सिर्जना सामुदायिक वनका अध्यक्ष कांग्रेस सभापति छत्र लिम्बूले समितिका पदाधिकारी तथा सदस्यहरूलाई थाहै नदिई १८ लाखभन्दा बढीको काठ बिक्री गरेपछि अख्तियार र वन कार्यालय छानबिनमा उत्रिएका छन् । 

कार्यकाल सकिएर चुनावी साधारणसभा हुनुपूर्व लिम्बूले सामुदायिक वनको घाटगद्दीबाट काठ बिक्री गरेका हुन् । उनले विभिन्न उपभोक्ता तथा केही संस्थालाई किर्ते कागजात बनाई काठ बिक्री गरेको खुलेपछि सोबारे वन कार्यालयले छानबिन अगाडि बढाएको छ । लिम्बूले ४ सय २८ दशमलव २१ क्युबिक फिट सखुवाको लकडी, २ सय ३२ दशमलव १७ क्युबिक फिट बोटधगेरो र ३ सय २८ दशमलव १७ क्युबिक फिट गरी कूल ९ सय ८७ दशमलव ५५ क्युबिक लकडी बिक्री गरेको खुलेको छ । 

रकम हिनामिना गरेको खुलेपछि वनले अलाउद्दिन अन्सारीलाई अनुसन्धानका लागि खटाएको छ । अख्तियारले छानबिन तथा कारबाहीका लागि २ पटक पत्राचार गरिसकेको बताइएको छ । लिम्बूले बेलबारी ८ को धीरनाथ स्याम्फुल माविलाई ४ लाख बराबरको सहयोग गरेको दाबी गरेका थिए । स्कूलले भने सिर्जना सामुदायिक वनबाट कुनै सहयोग प्राप्त नभएको भन्दै छानबिन गरिरहेका वन अधिकृतलाई पत्राचार गरेको छ । लिम्बूले केही उपभोक्ताको नाममा काठ खरिद गरेको रसिद काटेका थिए । प्रतिक्युबिक फिट १ हजार ६ सयदेखि ३ हजारको दरले लकडी किनेको विवरण बनाइएको थियो । उपभोक्ताहरूले समेत आफूहरूले काठ नलिएको बताएपछि लिम्बूले काष्ठ मिलमा लगेर काठ बिक्री गरेको अनुमान गरिएको छ । 

वनका अध्यक्षले मनोमानीसँग काठ बिक्री गरेको बारे सोध्दा सिर्जना सामुदायिक वनका पूर्वसचिव कृष्ण हुमागाइँले अध्यक्ष एक्लैले काठ बिक्री गरेको बताए । त्यसो त विभिन्न माथापच्चीका बाबजुद सो सामुदायिक वनमा नयाँ समिति चयन भएको छ । एक आपसमा भिडेका कांग्रेसका २ उम्मेदवारलाई उछिन्दै मोरङ ३ का संघीय सांसद सुनिल शर्मालाई चुनावमा सघाएका जनता समाजवादीका देउमान लिम्बू अध्यक्ष बनेका छन् ।