ट्रक आगलागीमा मृत्यु भएकाको पहिचान खुल्यो

गएराति पूर्वपश्चिम राजमार्गमा भएको सडक दुर्घटनामा मृत्यु हुनेको पहिचान खुलेको छ । मकवानपुरको मनहरी गाउँपालिका ६, नयाँबस्ती डिपाटस्थित राजमार्गमा दुईवटा ट्रक जुधेपछि भएको आगलागीमा मृत्यु भएकाको परिचय खुलेको छ । 

मृतकहरुमध्ये ना. ६ ख ६६६७ नम्बरका ट्रक चालक चितवनको राप्ती नगरपालिका ८ का २८ वर्षीय रिहान रुम्बा तामाङ हुन् । सोही ट्रकका सहचालक गोरखाको गण्डकी गाउँपालिका २ गोर्दीटारका २१ वर्षे सुमन चेपाङको पनि निधन भएकोे प्रहरीले जनाएको छ । आगलागीमा परेको अर्को ट्रक ना.६ ख ६३१ नम्बरको ट्रकका सहचालक मनहरी गाउँपालिका ३ का २० वर्षीय अमृत प्रजाकोसमेत मृत्यु भएको छ । 

ना.६ ख ६६६७ नम्बरको ट्रकमा सवार चितवनको राप्ती नगरपालिका ३ बस्ने ३५ वर्षीय विवेक तामाङ र ना. ६ ख ६३१ नम्बरको ट्रकमा रहेका मकवानपुरको मनहरी गाउँपालिका ३ बस्ने ३२ वर्षीय अर्जुनकुमार प्रजा घाइते छन् । घाइतेको भरतपुरस्थित अस्पतालहरुमा उपचार भइरहेको छ । 

विपरीत दिशाबाट आइरहेका दुई वटा ट्रक एकापसमा ठक्कर खाएपछि राजमार्गमै आगलागी भएको हो । लामो समयको प्रयासपछि आगलागी नियन्त्रणमा लिइएको र बिहान मात्रै सवारी सुचारु गरिएको इलाका प्रहरी कार्यालय मनहरीले जनाएको छ । 

मृतकहरुको शव पोष्टमार्टमका लागि हेटौंडा अस्पतालमा राखिएको छ । प्रहरीले जेसीबी प्रयोग गरेर जलेका शवहरु ट्रक भित्रबाट निकालेको थियो ।