सेनाको संख्या कटौतीबारे चलेको बहसमा पूर्वसैनिकहरु बोल्ने

नेपाली सेनाको संख्या कटौतीबारे संसददेखि सडकसम्म बहस चल्न थालेपछि अवकास प्राप्त सैनिक अधिकृतहरुले यसबारे धारणा राख्ने भएका छन् । रिपोर्टस क्लवमा भोलि पत्रकार सम्मेलन गरी सेनाको संख्या घटाउने सम्बन्धमा भैरहेका बहसप्रति पूर्वसैनिक अधिकारीहरुले आफ्ना भनाई राख्न लागेका हुन् ।

दिउँसो २ बजे आयोजना हुने पत्रकार सम्मेलनमा पूर्वसैनिक जनरलहरु डा. केशर बहादुर भण्डारी, बाबुकृष्ण कार्की, प्राे.एवं ईतिहासकार डा. प्रेमसिंह बस्न्यातलगायतले धारणा राख्ने बताइएको छ ।  माओवादी जनयुद्धका बेला ५० हजारको हाराहारीमा रहेको सेनाको संख्या अहिले झन्डै एक लाख पुगेको छ । तर, देशमा युद्ध र विपतको अवस्था नरहेको र सीमा सुरक्षामा समेत सेनाको भूमिका प्रभावकारी नरहेको भन्दै संख्या घटाउनुपर्ने बहस लामो समयदेखि चल्दै आएको छ । 

अस्ति राष्ट्रियासभाको बैठकमा बोल्दै पूर्व परराष्ट्रमन्त्री समेत रहेकी सांसद विमला पौड्यालले मुलुकभित्र लडाइँ नभएको र बाह्य शक्तिसँग जुध्ने क्षमता पनि नभएकाले सैनिक संख्या कटौती गरेर मुलुकको ढुकुटी बचाउनुपर्ने धारणा राखेकी थिइन् । 'देशभित्र लडाइँ छैन, छिमेकीबाट लडाइँ हुने सम्भावना पनि देखिंदैन । भइहाले पनि टिक्न सक्ने अवस्था देखिंदैन । ८०/९० हजार सेना चाहिने कि नचाहिने ?, उनले भनेकी थिइन् । 

त्यसअघि प्रतिनिधिसभा बैठकमा पनि सांसदहरुले चालू खर्च घटाउन सेनाको संख्या कटौती गर्न सकिने धारणा राखेका थिए । सांसदहरुले औपचारिकरुपमै सैनिक संख्यामा पुनरावलोकन गर्नुपर्ने बहस थालेपछि कतिपयले भने त्यसको विरोध गरेका छन् । यसप्रति नेपाली सेनासमेत सन्तुष्ट नरहेको चर्चा छ ।