अफ्रिकामा जस्तै यौटै चिन्हमा चुनाव लड्ने तयारी

संसदमा 'थर्ड पोल' बनाएर राष्ट्रिय राजनीतिमा निर्णायक पोजिसन कायम गरिराख्ने उध्देश्यप्रेरित चार दलको समाजवादी मोर्चालाई अफ्रिकन नेशनल कंग्रेसको मोडलबाट चलाउनेवारे छलफल केन्द्रित भएको छ । 

राजनीतिक उपलब्धिको रक्षा गर्दै समाजवादको लक्ष्यमा अघि बढ्न राजनीतिक पहलकदमी लिने उध्देश्य राखेको मोर्चालाई गोरा जातिविरुध्दको संघर्षका लागि बनेको अफ्रिकन कंग्रेस मोडल भनिएको हो । आगामी निर्वाचनमा यौटै चुनाव चिन्हमा लड्ने योजना साथ मोर्चाको छुट्टै झण्डा,लोगो र छाप हुनेछ । मोर्चाको सांगठनिक संरचना संघीय मोडलको हुनेछ । 

मोर्चाको कार्यविधिमा संघीय, प्रादेशिक र स्थानीय गरी तीन तहको सांगठनिक स्वरूप रहने उल्लेख छ । केन्द्रमा केन्द्रीय संयोजन समिति रहने छ । र, समितिमा घटक पार्टीका अध्यक्षहरूसहित प्रत्येक पार्टीबाट बढीमा ५/५ जना रहने छन् । संयोजन समितिको निर्णय कार्यान्वयनका लागि प्रत्येक पार्टीबाट प्रतिनिधित्व हुनेगरी सचिवालय गठन गरिने छ जनाइएको छ ।

प्रादेशिक तहमा प्रदेश संयोजन समिति रहने र त्यसमा मोर्चामा रहेका पार्टीका प्रदेशका अध्यक्ष/प्रमुखसहित प्रत्येक पार्टीबाट बढीमा ४/४ जनाको प्रतिनिधित्व रहने छ । आवश्यकतानुसार सचिवालय पनि गठन गर्न सक्ने भनिएको छ । त्यस्तै, स्थानीय तहमा जिल्लाका पार्टी अध्यक्ष तथा प्रमुखहरुसहित बढीमा ३-३ जना रहेको जिल्ला संयोजन समिति गठन गर्ने बताइएको छ । जिल्ला संयोजन समितिलाई आवश्यकतानुसार पालिका तहमा विस्तार गर्न अधिकार प्रत्यायोजन गरिएको छ ।

'यसलाई कतिपयले अफ्रिकन नेशनल कंग्रेस मोडल पनि भनेका छन् । त्यहाँजस्तै यहाँ पनि कम्युनिष्ट र गैरकम्युनिष्ट दुवै पार्टीहरु मोर्चामा रहेकाले समानता छ भन्न सकिन्छ',

त्यसैगरी, पार्टीका जनवर्गीय तथा मोर्चा सङ्गठनहरूबीच सहकार्यका लागि आवश्यक संयन्त्र निर्माण गर्ने सांगठानिक संरचना तय भएको छ । तर, मोर्चाका घटकहरूले आफ्नो अलग कार्यक्रममा पार्टी नीतिअनुरूप काम गर्न प्रत्येक पार्टी स्वतन्त्र हुने छन् ।

मोर्चा संवध्द माओवादी केन्द्रका एक नेताले गोरा जातिविरुध्द लड्न अफ्रिकाका पार्टीहरुले दीर्घकालीन मोर्चाबन्दी गरेजस्तै दक्षिणपन्थी शक्तिहरुले टाउको उठाउने प्रयास गरिरहेकाले गणतन्त्र,संघीयता,धर्म निरपेक्षता र सामाजिक न्यायसहितको समावेशी राज्य प्रणाली र समाजवाद मान्ने पार्टीहरु एक ठाउँमा उभिएको बताए । यसलाई प्रभावकारी बनाउन ठोस योजना र कार्यक्रम अघि बढाउने सहमति भएको उनले बताए ।   

'यसलाई कतिपयले अफ्रिकन नेशनल कंग्रेस मोडल पनि भनेका छन् । त्यहाँजस्तै यहाँ पनि कम्युनिष्ट र गैरकम्युनिष्ट दुवै पार्टीहरु मोर्चामा रहेकाले समानता छ भन्न सकिन्छ', उनले भने । लोकप्रियतावाद र पुनरुत्थानवादको बढ्दो प्रभाव रोक्न प्रगतिशील शक्तिहरु मिलेर जानुपर्ने आवश्यकता रहेकाले मोर्चाको आयु लामो रहेको ती नेताले बताए ।  

'घोर दक्षिणपन्थी राप्रपा र रङ्ग नखुलेको रास्वपाजस्ता शक्तिहरुले टाउको उठाइरहेका छन् । राजनीतिक उपलब्धिहरु सिध्याउने खतरा छ । त्यसविरुध्द लड्न बलियो शक्ति आवश्यक हुन्छ', उनी भन्छन्, 'कांग्रेस,एमाले र अरु अलग-अलग हुँदा त्यो सम्भव छैन । त्यस हिसाबले यो मोर्चा लामै समय जान्छ ।'