झण्डै सय किलो सुन यसरी आइपुग्यो विमानस्थल बाहिर

मंगलबार राति हङकङबाट क्याथे प्यसिफिकको उडानमा ल्याइएको कार्गोभित्र सुन रहेको सूचना हिजो बिहान मात्र सार्वजनिक हुन सक्यो । रातभर उक्त कार्गोबारे न भन्सार कार्यालय,न राजश्व न त प्रहरीले नै केही बताए ।

हालसम्मको प्रारम्भिक छानबिनअनुसार गाडी र स्कुटरको ब्रेक सुको खोलभित्र राखेर ल्याइएको एक सय केजी सुन काठमाडौं न्यूरोडका ब्यापारी दयाको हुनसक्ने आशंका प्रहरीको छ । दयाको पूरा विवरण खुलाइएको छैन ।

उक्त सुन सम्भवतः बैंकक,हङकङ,सिंगापुर र मलेसिया भिजिट भीसामा घुम्न गएका व्यक्तिलाई प्रयोग गरेर डलरमा किनी जम्मा गरिएको प्रहरीको आशंका छ । हिजो दिउँसो ३ बजेदेखि साँझ ५ बजेसम्म कार्गोको हिसाब राफसाफ गरेर निस्केका तीन वटा भाडाको गाडीलाई सिनामंगलको चक्रपथ नजिकैबाट नियन्त्रणमा लिइएको थियो ।

ती सवारी साधनमा बा.१६ च ७७१९, बा. ६ च ४७५ र बा. २४ च १७०४ नम्बरका हुन् । ती सवारी साधन स्कुटरको स्पेयर पार्टस बोकेर बिजुली बजारतर्फ जाँदै थिए । अस्ति राति आएको कार्गो स्क्यान गर्ने जिम्मेवारी सरोज श्रेष्ठसहित दुई जनाको थियो । उनीहरुले सामानमा रिचेक लेखिदिएका थिए । 

कर्मचारीले रिचेक लेखेपछि सामान छुटाउन राजेन्द्र राई,पशुपति गुरुङ,सुमन निरौला र परिवर्तन राईको समूह भन्सार कार्यालयमा पुगेको थियो । एक सय केजी भनिए पनि सुनको यकिन परिमाण पत्ता लागिसकेको छैन ।