लघुवित्तको विरोधमा माइतीघरमा प्रदर्शन, सरकारले माग सुनुवाई नगरेको आरोप

लघुवित्त तथा वित्तिय संस्थाले उठीबास लगाएको भन्दै लामो समयदेखि संघर्षमा उत्रिएका पीडितहरुले आज पनि आन्दोलनलाई निरन्तरता दिएका छन् । लघुवित्त संस्था खारेजीलगायतका माग राखेर काठमाडौँ केन्द्रित आन्दोलन थालेका पीडितहरु माइतीघर मण्डलामा अनशन बसेका छन् । 

ग्रामीण क्षेत्रका गरिब तथा विपन्न वर्गका स्थानीयको जीवनस्तर उकास्न मद्दत पुर्याउने उद्देश्यले खोलिएका लघुवित्तहरुले कर्जा असुलीमा ज्यादती गरेको पीडितहरुको आरोप छ । झण्डै छ हजार लघुवित्त पीडितहरुले ‘लघुवित्तीय संस्थाविरुद्धको सङ्घर्ष समिति’ नै गठन गरेर सरकारलाई दबाब दिएपनि उनीहरुका माग सम्बोधन भएको छैन । 

आमरण अनशन बसेको १० दिन बितिसक्दा पनि सरकारले माग सुनुवाई नगरेको भन्दै आन्दोलन थप सशक्त पार्ने उनीहरुको तयारी छ । 

लघुवित्त संस्थाहरुले लिने चर्को ब्याजदर, महँगो सेवाशुल्क र कर्मचारीको अमानवीय व्यवहारविरुद्ध पीडितहरू सङ्गठित भएको समितिले जनाएको छ । उनीहरुले लघुवित्त संस्थाहरू नाफा कमाउनमा मात्रै केन्द्रित हुँदा सदस्यले ऋणको भार बोक्नुपरेको र सरकारले पनि अहिलेसम्म लघुवित्तको समस्या समाधान गर्न कुनै पहल नगरेको आरोप लगाएका छन् । 

लघुवित्त क्षेत्रमा देखिएको समस्या समाधान गरी आफूहरुलाई न्याय दिन सरकार गुहारेका उनीहरुले माग सम्बोधन नभए सिंहदरबार घेर्ने चेतावनी दिएका छन् ।