गृहसचिवका भाइलाई जोगाउन युवतीसँग फोनमै गलफत्ती, ‘बलात्कार’ काण्डमा वकिल नै बिचौलिया

घरमा काम सघाउने युवतीमाथि यौन शोषण गरेको उजुरीअन्तर्गत काठमाडौं जिल्ला अदालतले अस्ति एकजना सरकारी इञ्जिनियरविरुद्ध पक्राउ पुर्जी जारी गरेको छ भने युवतीलाई होस्टाइल गराउन एक जना वकिलले मोलमोलाइ गरेको अडियो फेला परेको छ । घरको आर्थिक अवस्था कमजोर भएपछि कामका लागि काठमाडौं छिरेकी रामेछापकी आस्था बस्नेतले पूर्व गृहसचिव पदमप्रसाद पोखरेलका भाइ हरिमाथि बलात्कार प्रयासको आरोपसहित गतहप्ता किटानी जाहेरी दर्ता गराएकी थिइन् । 

सिनामंगलस्थित पोखरेलको घरमा डिभोर्सी ती युवतीले काम गर्न थालेको डेढ वर्ष भइसकेको छ । उनले भान्सादेखि लिएर सरसफाइलगायत सबै काम गर्थिन् । ‘एकपटक चुम्बन गर्न देऊ’ भन्दै उनी अगाडि सरेको बस्नेतले सार्वजनिक गरेको भिडियोमा देखिन्छ । त्यसपछि आफू काममै जान छोडेको उनी बताउँछिन् । पोखरेलकी श्रीमती अनुपमालाई घटनाबारे जानकारी गराउँदा उल्टै थर्काएको उनको आरोप छ । 

उनी असार १८ गते जाहेरी लिएर महानगरीय प्रहरी वृत्त, गौशाला पुगेकी थिइन् । तर, प्रहरीले निवेदन दर्ता गर्न आलटाल ग¥यो । दिनभर झुलाएर माइती नेपाल पठाएको बताउँदै न्याय माग्न गृह मन्त्रालयसमेत पुगेकी उनले मुद्दा फिर्ता लिन आफूलाई चौतर्फी दबाब आइरहेको बताइन् । 

प्रहरीले भने बलात्कारको आरोपमाथि नै शंका व्यक्त गरेको छ । एक जना अधिकृतले भने, ‘जाहेरी दर्ता भएर अनुसन्धान अघि बढिसकेको छ । यो घटना हेर्दा प्रि–प्लानजस्तो देखिन्छ । कतैकतै ‘हनी ट्रयाप’ हो कि जस्तो पनि लाग्छ । अहिलेसम्मको इतिहासमा पीडित महिला यसरी दर्जन बढी युट्युबर, वकिल लिएर आएको थाहा छैन । यता, भिडियो पनि बनाएकी रहिछन् । अहिले अनुसन्धानकै क्रममा छ । ’ 

जिल्ला प्रहरी परिसर, काठमाडौंका डिएसपी अनिल अधिकारीले उक्त विषयमा छानबिन भइरहेको र पोखरेलले पहिले नै जिल्ला अदालतबाट ‘स्टे अर्डर’ ल्याएकाले तत्काल पक्राउ गर्न नमिलेको बताए । 

यता, बस्नेतले सम्पूर्ण कुरा नखोलेको र उनले उक्त भिडियोसमेत आफूहरूलाई नदेखाएको माइती नेपालको ठोकुवा छ । ‘उहाँले त्यतिबेला त्यो भिडियो देखाएको भए, रेप केशमा मुद्दा चलाइसकेका हुन्थ्यौं । उहाँलाई श्रीमानको नामसमेत थाहा थिएन । श्रीमतीको नाम भन्नुभयो, हामीले नै श्रीमानको नाम पत्ता लगाइदिएका हौं’, त्यहाँका एक अधिकारीले भने । 

पोखरेल सडकका इञ्जिनियर हुन् । त्योभन्दा पनि ठूलो उनलाई आफ्ना दुई जना शक्तिशाली दाइको आड छ । पूर्व गृहसचिव पदम पोखरेल उनका दाजु हुन् भने गृह मन्त्रालयमा प्रवक्ताको जिम्मेवारी निर्वाह गरिसकेका फणिन्द्रमणि पोखरेलको समेत भाइ नाता पर्छन् । भ्रष्टाचार मुद्दामा मुछिइसकेका उनलाई यसअघि आफ्नै दाइहरूले बचाएका थिए । कास्कीको एसपी हुँदा अहिले काठमाडौंका प्रहरी प्रमुख दानबहादुर कार्कीले ९ लाख घुस काण्डमा उनलाई समातेर अख्तियारलाई बुझाइदिएका थिए ।

वकिल नै बिचौलिया

यो प्रकरणमा अधिवक्ताहरू बिचौलियाको रूपमा सल्बलाएको प्रमाण भेटिएको छ । अनामनगरमा ‘ईम्पेरियल लिगल सोलुशन सेन्टर’ सञ्चालन गरेर बसेका अधिवक्ता भोजराज रेग्मीले ती युवतीलाई फोन गरी मिलापत्र गर्न दबाब दिएको अडियो जनआस्थाले फेला पारेको छ । १८ मीनेट लामो अडियोमा रेग्मीले बस्नेतलाई उक्त भिडियोले रेप पुष्टि नगर्नेसमेत उल्लेख गरेका छन् । रेग्मीले पोखरेल निकै शक्तिशाली रहेको त्रास देखाउँदै कानुनी लडाइँ लड्नुको कुनै औचित्य नभएको बताएका छन् । ‘यिनीहरूसँग कुरा गरेर, पैसा लिई सेटलमेन्ट गराइदिन्छु, तिम्रो पनि सेटलमेन्ट हुनुपर्‍यो नि, परेन ? त्यसकारण यो अनावश्यक मान्छेसँग तिमी भिड्न छोड । तिमीलाई रेप गरेको होलाजस्तो मलाई लाग्दैन’, उनले भनेका छन्, ‘तिमी पनि बलियी छौ नि । तिमीलाई च्याप्प समाती लडाएर गरिहाल्नचाँहि गाह्रै हुन्छ नि । म पनि उमेरमा त उद्दण्डै थिएँ हेर । गरिहाले पनि छोड अब । आफ्नो वास्तविकता हेर । अवसरहरू आउँछन्, त्यसलाई क्याच गर्न सक्नुपर्छ । ’

साथै, उनले ती युवतीको रूपरङ्ग देखेर आफैं फिदा भएकोसमेत बताएका छन् । उनलाई पहिलोपटक देख्दा छक्क परेको र राम्री हुनु आफैंमा अभिषाप भएकोसम्म उनी बताउँछन् । २०५५ सालदेखि सिनामंगलमा बसेको सुनाउँदै रेग्मीले भनेका छन्, ‘म तिनीहरू जत्तिकै पावरफुल मान्छे हुँ । तिनीहरू जत्तिकै धनी मान्छे हुँ । ’ रेग्मीले उनलाई कुनै पनि हालतमा पोखरेलसँग लड्न नसक्ने भनी ब्याक हट्न दबाब दिइरहेको सुनिन्छ । काठमाडौं शहरले मान्छेलाई कि एक नम्बर, कि पंगु बनाउँछ भन्दै उनले जुनसुकै हालतमा पनि मिलापत्र गर्नुपर्ने जनाएका छन् । ती युवतीको तपाईंहरूलाई मिल्दे हुन्थ्योजस्तो लाग्छ भन्ने प्रश्नमा आक्रोशित हुँदै उनी भन्छन्, ‘मिल्दे हुन्थ्यो होइन कि मिल्नुपर्छ तिमीले । मैले तिमीलाई फोनमा सबै कुरा भन्न सक्दिँन । भेट्न आऊ ।’