श्रीमानका अङ्ग रक्षकको पेस्तोल तीन सातापछि बल्ल भेटियो

सर्वोच्च अदालतका न्यायाधीश नहकुल सुवेदीका निजी सुरक्षा अधिकृत (पीएसओ) ले बोक्दै आएको पेस्तोल हराएको तीन सातापछि फेला परेको छ । प्रभाकर खड्काले बोक्दै आएको उक्त पेस्तोल गत असार ३० गते हराएको थियो ।

चोरिएको पेस्तोलसहित बौद्धबाट सिन्धुपाल्चोकका वासुदेव थामी र सिन्धुलीका मेघबहादुर तामाङलाई पक्राउ गरिएको छ । मेघबहादुरको बयानपछि थामीलाई नियन्त्रणमा लिइएको जिल्ला प्रहरी परिसर काठमाडौंले जनाएको छ । 

पेस्तोल खड्काको घरबाटै हराएको जाहेरी परेपछि प्रहरीले खोजतलास गरेको थियो । त्यसलगत्तै खड्काले पेस्तोल चोरी भएको भनी प्रहरी वृत्त बौद्धमा जाहेरी दिएका थिए । पेस्तोल कोठाबाटै हराएको खड्काको दाबी छ ।