धनुषामा बालक डुबे, पर्वतमा महिला

धनुषामा पोखरीमा डुबेर एक बालकको ज्यान गएको छ । शहिदनगर नगरपालिका ५, हरवाडा चपुतरा चोकस्थित पोखरीमा डुबेर स्थानीय ३ वर्षीय अनुराग मण्डलको निधन भएको हो । 

आज बिहान अचानक लडेर उनी पोखरीमा डुबेका थिए । गम्भीर घाइते अवस्थामा उनलाई उपचारार्थ प्रादेशिक अस्पताल जनकपुर लैजाने क्रममा बाटोमै मृत्यु भएको बताइएको छ । 

पर्वतमा पनि कुलोमा डुबेर एक महिलाको निधन भएको छ । फलेबास नगरपालिका ४, शिरसुवाकी ६२ वर्षीया हरिकला नेपालीको स्थानीय सिचाईं कुलोमा डुबेर आज दिउँसो मृत्यु भएको हो । 

दुबै घटनाबारे अनुसन्धान भइरहेको प्रहरीले जनाएको छ ।