हेलो सरकार अब २४ सै घण्टा, २५ जना कर्मचारी निरन्तर खटिने

विगत १२ वर्षदेखि सञ्चालनमा रहेको ‘हेलो सरकार’ लाई अब तीन सिफ्टमा चलाइने भएको छ । प्रधानमन्त्री पुष्पकमल दाहाल प्रचण्डले आज प्रधानमन्त्री कार्यालयबाट हेलो सरकारको सेवा विस्तार शुभारम्भ गर्नुभएको छ ।

यसअघि नेपाल टेलिकमबाट मात्र सेवा प्रवाह हुने गरेकोमा विस्तारित कार्यक्रममा एनसेल मोबाइलबाट समेत गुनासो राख्न सकिनेछ । गुनासाहरु फोन, इमेल, फेसबुक, ट्वीटर, पोर्टल, भाइबर, ह्वाट्सएप लगायत डिजिटल माध्यमबाट टिपाउन सकिनेछ । हेलो सरकारको डेस्कले प्राप्त गुनासा तत्काल सम्बोधन गरेर सोको जानकारी सम्बन्धित निवेदकलाई दिने व्यवस्था मिलाइएको छ ।

हेलो सरकार २४ सै घण्टा सञ्चालनका लागि तीन सिफ्टको कार्यतालिका निर्माण गरी सोहीअनुरूप कर्मचारी व्यवस्थापनसमेत गरिएको छ । त्यसका लागि तीन जना उपसचिवसहित २५ जना कर्मचारी खटाइएको छ । प्राप्त गुनासोका प्रकृति हेरेर सम्बन्धित निकायमा पठाई समस्या समाधानमा सहजीकरणसमेत गर्ने बताइएको छ । 

प्रधानमन्त्री तथा मन्त्रिपरिषदको कार्यालयसँग सम्बन्धित गुनासोहरू सिधै सम्बोधन गरिने जानकारी गराइएको छ । गुनासो सम्बोधनका निम्ति र्यापिड रेस्पोन्स टीमसमेत गठन गरेर कार्यान्वयनमा ल्याइएको मुख्यसचिव डा. बैकुण्ठ अर्यालले बताउनुभयो । उटीमले सम्बन्धित निकायमा पठाइएका गुनासा कार्यान्वयन भए, नभएको अनुगमन गर्नुका साथै गुनासो सम्बोधनका लागि पहल गर्नेछ ।

हेलो सरकारको २४ सै घण्टा सञ्चालन हुने सेवाको शुभारम्भ गर्दै प्रधानमन्त्रीले जनताका समस्यालाई गम्भीरतापूर्वक लिई समाधान गर्न निर्देशन दिनुभएको छ । शुभारम्भ समारोहमा मुख्यसचिव, सचिवहरू, विभागीय प्रमुखहरू, मन्त्रालय तथा केन्द्रीय निकायका गुनासो सुन्ने अधिकृतहरू, हेलो सरकार कक्षमा कार्यरत कर्मचारीहरू सहभागी थिए ।