रिजर्भ बस राजमार्गमा दुर्घटना, सात जनाको मृत्यु

पूर्व–पश्चिम राजमार्गअन्तर्गत बाँकेमा भएको सडक दुर्घटनामा साता जनाको मृत्यु भएको छ । शमशेरगञ्ज नजिकै रोकिराखेको ट्रकमा गुडिरेको बस ठोक्किँदा उनीहरुको ज्यान गएको  हो । 

दाङबाट बर्दियातर्फ जाँदै गरेको ना. ७ ख २३२१ नम्बरको यात्रुबस राजमार्गमा रोकिराखेको ना. ८ ख ६४०५ नम्बरको ट्रकमा ठोक्किएपछि  बसका सात जना यात्रुको निधन र २९ जना घाइते भएका हुन् ।

दुर्घटना राति साढे ९ बजेको समयमा भएको हो । बाँके प्रहरीका अनुसार दुर्घटनामा बसका चालक र सहचालकसहित सात जनाको मृत्यु भएको छ । घाइतेहरुको बाँकेको कोहलपुरस्थित शिक्षण अस्पतालमा उपचार भइरहेको छ ।

बर्दियाको ठाकुरद्वारास्थित बेतनी सामुदायिक वनका उपभोक्ताहरू रिजर्भ गर्दै दाङको धारापानी र थारू संग्रहालयको निरीक्षण भ्रमण गरेर फर्कंदा बस दुर्घटनामा परेको हो ।