गोकर्ण रिसोर्टको एमाले भेलामा विदेशी पाहुना आउने क्रम जारी

एमालेले आयोजना गरेको एसियाली राजनीतिक दलहरुको अन्तर्राष्ट्रिय सम्मेलन (आइक्याप) मा सहभागी हुन विदेशबाट पाहुना आउने क्रम जारी छ । हिजोदेखि गोकर्ण रिसोर्टमा भएको आइक्यापको ४० औं स्थायी कमिटी र एसिया युरोप पोलिटिकल फोरमको पाँचौ बैठकमा कोरिया र इण्डोनेसियाका पाहुना हिजो दिउँसो र राति आइपुगेका हुन् ।

दक्षिण कोरियाली राष्ट्रिय सभाका सदस्य चो जोङ सिक, हा ताय किउङ तथा प्रशासन विभागका बायोन डायओन हिजो राति सवा १० बजे काठमाडौं आइपुगेका छन् । उनीहरु क्याथे प्यासिफिकको उडान नम्बर सीएक्स ६०३ मा हङकङबाट आएका हुन् ।

त्यसैगरी सिंगापुर एअरको उडान नम्बर एसक्यु ४४० मा दिउँसो २ बजे । इण्डोनेसियाका सिनेटर डायना विदुस्तुती देवासा काठमाडौं आइपुगेका छन् ।

कार्यक्रममा सहभागी हुन बंगलादेश र कम्बोडियाका सिनेटरहरु अस्ति आइपुगेका थिए । बंगलादेशका राना एम सोहिल र सिरिन एस लिरा, कम्बोडियाका सिनेटर पूर्व मेजर जनरल सुओस यारा र कम्बोडियाकै सिनेटर एङ कोथे कार्यक्रममा सहभागी भएका छन् ।