कम्बोडियामा लगानी गरेको पत्ता लगाउनेलाई केपी ओलीले एक हजार थपेर दिने
नेकपा एमालेका अध्यक्ष केपी शर्मा ओलीले कम्बोडियाको टेलिकममा लगानी गरेको भनेर आफू र आफ्नो पार्टीको बदनाम गर्न खोजिएको बताउनुभएको छ ।
आज पोखरामा आयोजित गण्डकी प्रदेश अधिवेशनबाट निर्वाचित पदाधिकारीको शपथ ग्रहण कार्यक्रमलाई सम्बोधन गर्दै उहाँले एमाले सिध्याउन यस्ता अनर्गल प्रचार गरिएको दावी गर्नुभयो । त्यसक्रममा ओलीले कम्बोडियामा आफूले लगानी गरेको प्रमाण ल्याउन चुनौतीसमेत दिनुभयो ।
उहाँले भन्नुभयो, ‘कहिले कम्बोडियामा लगानी गरेको भन्छन् । कहिले ठाउँ-ठाउँमा जग्गा र महल छ भन्छन्, यो सबै एमाले सिध्याउन गरिएको दुष्प्रचार हो । कम्बोडियामा मैले टेलिकममा लगानी गरेको रहेछु भने पत्ता लगाउनुस्, १ हजार थपेर तपाईँलाई नै दिन्छु ।’
एमालेका पूर्वकेन्द्रीय सदस्यसमेत रहेका मेडिकल व्यवसायी दुर्गा प्रसाईंले केही समयअघि कम्बोडियाको कम्पनीमा ओलीको लगानी रहेको दावी गरेका थिए । एमालेमा रहँदासम्म ओलीलाई हजुरबा भनेर सम्बोधन गर्ने प्रसाईले सार्वजनिक मंचबाटै उक्त दावी गरेपछि गरेपछि यसबारे विभिन्न टिकाटिप्पणी भैरहेको छ ।
अध्यक्ष ओलीले प्रसाईको नाम नलिई प्रमाण ल्याउन चुनौती दिनुभएको हो ।
टिप्पणीहरू