प्रधानमन्त्रीलाई तत्काल अपदस्थ गर्न माग गर्नेलाई मन्त्रीले भने, ‘यो पागलपन हो !’

युद्धग्रस्त इजरायलका प्रधानमन्त्री बेन्जामिन नेतन्याहुलाई प्रतिस्थापन गर्नुपर्ने माग चर्कोसँग उठेको छ । त्यहाँको विपक्षी दलका नेता यायर लापिडले नेतन्याहु नेतृत्वको चरम दक्षिणपन्थी मन्त्रिपरिषद्लाई प्रतिस्थापन गर्ने समय आएको बताएका हुन् । 

हमासमाथिको कारवाहीका नाममा गाजा शहरमा लगातार आक्रमण बढाउँदा अन्तर्राष्ट्रियरुपमा आलोचना खेपिरहेका नेतन्याहुलाई अपदस्थ गर्नुपर्ने आवाज इजरायलभित्र उठेपछि त्यसले तरंग छाएको छ । ‘हामीले राष्ट्रिय पुनर्निर्माण सरकार गठन गर्नुपर्छ, लिकुडले यसको नेतृत्व गर्नेछ, नेतान्याहु र चरमपन्थीहरूलाई प्रतिस्थापन गरिनेछ,’ ल्यापिडले ट्वीटरमार्फत् भनेका छन् ।

इजरायली सेना र जनताले अक्टोबर ७ को आक्रमणपछि लचिलोपन देखाउँदै आएको पनि उनले भनेका छन् । जसको फाइदा प्रधानमन्त्री नेतान्याहुले लिइरहेको र जनतालाई धोका दिएको ल्यापिडको दाबी छ । उनले भने, ‘सरकारको कमजोरीको कारण देशमा आक्रमण भएको हो, विशेषगरी प्रधानमन्त्री यसको मुख्य कारण हो ।’

विपक्षी दलका नेता ल्यापिडको पछिल्लो टिप्पणीलाई इजरायलको राजनीतिकभित्र बढ्दो असहमतिको संकेतको रूपमा हेरिएको छ । हमासमाथिको प्रतिआक्रमणमा नेतन्याहुको असफल नेतृत्वले बढाएको निराशाको परिणामका रुपमा पनि ल्यापिडको पछिल्लो टिप्पणीलाई लिइएको छ । तर, विपक्षी दलकै  कतिपय नेताले भने द्वन्द्व सकिएपछि यो विषय टुंग्याउनुपर्नेमा जोड दिएका छन् ।

‘म यो आवाजहरू सुन्छु कि यो समय होइन,’ ल्यापिडले भने, ‘तर, हामीले ४० दिन पर्ख्यौं, अब समय छैन । हामीलाई अहिलेको आवश्यकता भनेको सुरक्षा र अर्थतन्त्र बाहेक अरू केही गर्ने सरकारको हो । हामी आगामी वर्षमा अर्को चुनाव वहन गर्न सक्दैनौं ।’

तर, नेतन्याहु क्याबिनेटका मन्त्रीमध्ये एक बेन्नी गान्ट्जले भने ‘प्रधानमन्त्रीलाई प्रतिस्थापन गर्ने आह्वान पागलभन्दा कम छैन’ भन्ने प्रारम्भिक प्रतिक्रिया दिएका छन् ।