चिनियाँ खेलाडीहरु फेरि चीनबाट चार्टर उडानमा आउँदै

पोखरामा हुन लागेको ‘अन्तर्राष्ट्रिय माउण्टेन क्रस कन्ट्री प्रतियोगिता’ मा भाग लिन चिनियाँ खेलाडी चार्टर उडानमार्फत नेपाल आउने भएका छन् । प्रतियोगितामा सहभागिता जनाउन खेलाडीसहित अन्य पाहुना गरी एक सय चार जना हिमालय एअरलाइन्सको विमान चार्टर गरी पोखरा जान लागेका हुन् । 

चीन सरकारको सहयोगमा उनीहरु चार्टर उडानमा नेपाल आउन लागेको जनाइएको छ । नेपाल पर्यटन बोर्ड, नेपालका लागि चिनियाँ राजदूतावास, पोखरा महानगरपालिकाको संयुक्त आयोजना तथा चीनको युनान माउण्टेनियरिङ एण्ड आउटडोर स्पोर्ट्स एसोसिएसन र होटल एसोसिएसन, पोखराको सहकार्यमा मंसिर ९ गतेदेखि पोखरामा मैत्रीपूर्ण दौड प्रतियोगिता ‘अन्तर्राष्ट्रिय माउण्टेन क्रस कन्ट्री प्रतियोगिता’ हुँदैछ । 

नेपाल र चीनको मैत्रीपूर्ण सम्बन्ध विस्तार तथा नेपालको पर्यटन प्रवद्र्धन गर्ने उद्देश्यले आयोजना गर्न लागिएको प्रतियोगितामा दुबैतर्फका १०, १० टोली सहभागी हुने छन् । एउटा टोलीमा तीन जनाको दरले प्रतियोगितामा कूल ६० जना सहभागी हुने आयोजकले जनाएको छ ।

प्रतियोगितामा धावकहरुले दौड, साइक्लिङ र फेवातालमा बोटिङ गरी ४० किलोमिटर पार गर्नुपर्नेछ । फेवाताल किनार, बाराहीघाटबाट शुरु हुने प्रतियोगिता डेभिडफल्स हुँदै शान्ति स्तुपा पुगेर फेवातालमा बोटिङ गरी पुनः बाराहीघाटमा आइपुगेर अन्त्य हुनेछ । 

प्रतियोगितामा प्रथम हुने टोलीले तीन लाख ६० हजार, द्वितिय हुनेले दुई लाख ८८ हजार, तृतीय हुनेले दुई लाख १६ हजार, चौथौ हुनेले एक लाख ४४ हजार र पाँचौं हुनेले ९० हजार रुपैयाँ पुरस्कार पाउनेछन् । 

सन् २०१९ मा पहिलोपटक पोखरामा ‘अन्तर्राष्ट्रिय माउण्टेन क्रस कन्ट्री प्रतियोगिता’ को आयोजना गरिएको थियो । गत असार ८ र ९ गते पोखरामा आयोजित ‘चिनियाँ ड्रागन बोट रेस’ मा भाग लिन आएका चिनियाँ खेलाडीहरु पनि विमान चार्टर गरेर त्यहाँ पुगेका थिए ।