वायुसेवा निगमका अधिकृत अवैध गिरोहमा संलग्न, नक्कली कागजात बनाएको पुष्टि

नक्कली कागजात बनाएको अभियोगमा नेपाल वायुसेवा निगमका एक जना अधिकृत पक्राउ परेका छन् । सर्वसाधारणलाई भिजिट भिसामा खाडी मुलुक पठाउन नक्कली कागजात बनाउने गिरोहमा संलग्न भएको आरोपमा होमनाथ पोखरेललाई नियन्त्रणमा लिइएको बताइएको छ ।

उपत्यका अपराध अनुसन्धान कार्यालय, बानेश्वरले उनलाई पक्राउ गरेको एसपी रवीन्द्र रेग्मीले जानकारी दिएका छन् । भिजिट भिसामा कामदार पठाउने गिरोहको अनुसन्धानको क्रममा पोखरेलको संलग्नता देखिएको हो । नक्कली कागजात प्रकरणमा प्रहरीले यसअघि १३ जनालाई पक्राउ गरेको थियो । 

उनी निगमको त्रिभुवन विमानस्थलस्थित आन्तरिक टर्मिनलतर्फको कार्यालयमा कार्यरत हुन् । पक्राउपछि सरकारी कागज किर्ते मुद्दामा म्याद थप गरेर अनुसन्धानका लागि उपत्यका अपराध अनुसन्धान कार्यालय टेकूको हिरासतमा राखिएको छ ।