अमेरिकाबाट आएको पार्सलमा गाँजाको पोको, हुलाक कार्यालय छेउबाट तीनजना पक्राउ

अमेरिकाबाट पार्सल गरी ल्याइएको एक किलो गाँजासहित तीनजना बारामा समातिएका छन् । 

प्रहरीको लागूऔषध नियन्त्रण ब्यूरो वीरगन्ज र जिल्ला प्रहरी कार्यालय बाराको संयुक्त टोलीले हिजो साँझ जिल्ला हुलाक कार्यालय नजिकैबाट उनीहरुलाई पक्राउ गरेको हो । वीरगन्ज महानगरपालिका–१ सिसौवारी निवासी २२ वर्षीय नैमोदिन मियाँ, २७ वर्षीय जितेन्द्र साह र २२ वर्षीय कृष्णा सर्राफ समातिएको प्रहरीले बताएको छ । 

विदेशबाट आएको कार्टुनमा पोपर्कन मिक्स ट्रियो लेखिएको रातो रंगको टिनको डब्बाभित्र तीन प्याकेट गाँजा, ओल्ड फेसन्ड ओट्स लेखिएको डब्बाभित्र एक प्याकेट गाँजा र क्युक ओट्स लेखिएको डब्बाभित्र एक प्याकेट गरी १ किलो १४६ ग्राम गाँजा बरामद भएको प्रहरीले जनाएको छ ।